ក្រុមហ៊ុន Apple កំពុងកាត់បន្ថយការផលិត iPhone 14 ស៊េរីមួយនេះ ដោយសារតម្រូវការតិចជាងការរំពឹងទុក
- October 19, 2022
ក្រុមហ៊ុន Apple កំពុងកាត់បន្ថយការផលិត iPhone 14 Plus ក្រោយរយៈពេលប៉ុន្មានសប្តាហ៍នៃការចាប់ផ្តើមការនាំចេញរបស់ខ្លួន បន្ទាប់ពីបានវាយតម្លៃឡើងវិញនូវចំនួនតម្រូវការសម្រាប់ម៉ូដែលកម្រិត mid-range មួយនេះ។ បើយោងតាមទីភ្នាក់ងារ The Information ដែលដកស្រង់ពីប្រភពពាក់ព័ន្ធនឹងខ្សែសង្វាក់ផ្គត់ផ្គង់របស់ក្រុមហ៊ុន Apple បានឱ្យដឹងថា ក្រុមហ៊ុនមានមូលដ្ឋាននៅទីក្រុង Cupertino រដ្ឋកាលីហ្វ័រញ៉ាមួយនេះ បានប្រាប់ក្រុមហ៊ុនផលិតរបស់ខ្លួនយ៉ាងហោចណាស់ ១ នៅក្នុងប្រទេសចិន ឱ្យបញ្ឈប់ជាបន្ទាន់នូវការផលិតគ្រឿងបន្លាស់សម្រាប់ iPhone 14 Plus ។
ការផ្លាស់ប្តូរនេះបានកើតឡើង នៅពេលដែលទីផ្សារស្មាតហ្វូនពិភពលោកកំពុងមានការធ្លាក់ចុះយ៉ាងខ្លាំង ជាមួយនឹងការធ្លាក់ចុះ ៩% នៅក្នុងត្រីមាសទី៣ ធៀបនឹងរយៈពេលដូចគ្នាកាលពីឆ្នាំមុន នេះបើយោងតាមការប៉ាន់ស្មានពីក្រុមហ៊ុនស្រាវជ្រាវទិន្នន័យ Canalys របស់សិង្ហបុរី។ យ៉ាងណាក៏ដោយ Apple មិនបានឆ្លើយតបភ្លាមៗចំពោះសំណើសុំការអត្ថាធិប្បាយពីរ៉យទ័រនោះទេ។
គួរឱ្យដឹងដែរថា ទូរសព្ទ iPhone 14 Plus ដែលជាចំណែកមួយនៃគ្រួសារ iPhone 14 ស៊េរីថ្មី ត្រូវបានគេបង្ហាញវត្តមាន កាលពីថ្ងៃទី០៧ ខែកញ្ញា ហើយវាគឺជាប្រភេទមធ្យមដែលធូរថ្លៃជាង iPhone Pro ខណៈការដឹកជញ្ជូនរបស់វាបានចាប់ផ្ដើម កាលពីថ្ងៃទី០៧ ខែតុលា កន្លងទៅនេះ។ កាលពីខែមុន Apple ក៏បានលុបចោលនូវផែនការក្នុងការបង្កើនការផលិតទូរស័ព្ទ iPhone ស៊េរីថ្មីរបស់ខ្លួន ដោយសារតែការរំពឹងទុករបស់ខ្លួនហ៊ាក់មិនអាចសម្រេចបានទេ នេះបើយោងតាមរបាយការណ៍របស់ Bloomberg ៕
អត្ថបទ៖ លីដា
ប្រភព៖ រ៉យទ័រ
- Share This Post: