បើតាមការចុះផ្សាយរបស់សារព័ត៌មាន BBC បានរាយការណ៍ថា ក្រុមហ៊ុនបច្ចេកវិទ្យាសរសៃប្រសាទ Neuralink របស់លោក Elon Musk បានទទួលការយល់ព្រមពីរដ្ឋបាលចំណីអាហារ និងឱសថអាមេរិក (FDA) ជាផ្លូវការ ដែលវានឹងបើកផ្លូវឱ្យ Neuralink អាចធ្វើតេស្តបន្ទះឈីបរបស់ខ្លួននៅលើមនុស្សជាលើកដំបូងបំផុត។ ក្រុមហ៊ុននេះចង់ជួយស្តារចក្ខុវិស័យ និងការចល័តរបស់មនុស្ស តាមរយៈការភ្ជាប់ខួរក្បាលជាមួយកុំព្យូទ័រ ប៉ុន្តែក្រុមហ៊ុនមិនទាន់មានផែនការភ្លាមៗ ដើម្បីចាប់ផ្តើមជ្រើសរើសអ្នកស្ម័គ្រចិត្តធ្វើតេស្ដនោះទេ។

គួររំលឹកផងដែរថា ការដាក់ស្នើពីមុនរបស់ក្រុមហ៊ុន Neuralink ដើម្បីឈ្នះការយល់ព្រមពី FDA ត្រូវបានបដិសេធ ដោយហេតុផលសុវត្ថិភាព នេះបើយោងតាមរបាយការណ៍នៅក្នុងខែមីនា ដោយទីភ្នាក់ងារសារព័ត៌មានរ៉យទ័រ។

ក្រុមហ៊ុន Neuralink សង្ឃឹម​ថា ​នឹង​ប្រើ​មីក្រូ​ឈីប​របស់​ខ្លួន ​ដើម្បី​ព្យាបាល​លក្ខខណ្ឌ​ដូចជា ​ខ្វិន​ និង​ពិការ​ភ្នែក​ និង​ជួយ​ជន​ពិការ​ខ្លះ ​ឱ្យ​ប្រើ​កុំព្យូទ័រ​ និង​បច្ចេកវិទ្យា​ទូរសព្ទ។ បន្ទះឈីប ដែលធ្លាប់ត្រូវបានសាកល្បងនៅក្នុងសត្វស្វា ត្រូវបានរចនាឡើងដើម្បីបកស្រាយសញ្ញាដែលផលិតនៅក្នុងខួរក្បាល និងបញ្ជូនព័ត៌មានទៅកាន់ឧបករណ៍តាមរយៈប៊្លូធូស។ លោក Musk ក៏ធ្លាប់បានស្នើដែរថា បច្ចេកវិទ្យាដែលបានស្នើឡើង អាចជួយបន្ធូរបន្ថយការព្រួយបារម្ភថា មនុស្សនឹងត្រូវជំនួយដោយ AI ៕

អត្ថបទ៖ លីដា
ប្រភព៖ BBC