រាជធានីភ្នំពេញ៖ នៅថ្ងៃទី៣០ ខែឧសភា ឆ្នាំ២០២៣ យោងតាមគណនីហ្វេសប៊ុកផ្ទាល់របស់ កីឡាករគុនខ្មែរ ទូច រ៉ាឆាន់ ឬហៅ បឺត សង្ឃឹម ម្ចាស់មេដាយមាស លើវិញ្ញាសាឃីកបុកស៊ីង (Kickboxing) ប្រភេទទម្ងន់ ៥៧គីឡូក្រាម ក្នុងព្រឹត្តិការណ៍ស៊ីហ្គេមលើកទី៣២ បានរៀបរាប់យ៉ាងក្រៀមក្រំថា ខណៈពេលនេះ ជង្គង់របស់លោក បានដាច់សរសៃ ACLបាត់ហើយ ដែលធ្វើឱ្យលោកខកខាតមិនអាចឡើងសង្វៀនបានទេ ដោយត្រូវប្រើពេលជិត ១ឆ្នាំ ទើបជាសះស្បើយ។

ក្នុងគណនីហ្វេសប៊ុកផ្ទាល់របស់ កីឡាករគុនខ្មែរ បឺត សង្ឃឹម បានសរសេររៀបរាប់ពីទុកក្រៀមក្រំរបស់ខ្លួនយ៉ាងដូច្នេះថា៖ « បងប្អូនប្រហែលជានឹកខ្ញុំមួយរយៈហើយ រឿងមិនចង់ជួប ហេតុអ្វីធ្លាក់មកលើខ្ញុំពេលនេះ? បងប្អូនតើខ្ញុំគួរគិតបែបណា បើសរសៃជង្គង់របស់ខ្ញុំ វាដាច់បាត់ហើយ ព្រោះពេលប្រកួតស៊ីហ្គេមចេះតែឈឺ ដល់ពេលប្រកួតចប់ទើបទៅ ថតឃើញថា ដាច់សរសៃ ACL បាត់ហើយ គ្រូពេទ្យថា ទាល់តែវះកាត់ទើបមានសង្ឃឹមហើយប្រើពេលជិត១ឆ្នាំ ពេលនេះមិនដឹងថាគិតយ៉ាងម៉េចទេបងប្អូន ៕ »

ប្រភព៖ Bird songkherm – ទូចរ៉ាឆាន់