កូរ៉េខាងត្បូងបានដាក់ទណ្ឌកម្មក្រុមហេគឃ័រ Kimsuky ដែលមានពាក់ព័ន្ធក្នុងការអភិវឌ្ឍន៍ផ្កាយរណបរបស់កូរ៉េខាងជើង
- BY
- autoadmin
- June 2, 2023
កូរ៉េខាងត្បូងបានប្រកាសដាក់ទណ្ឌកម្មជាឯកតោភាគី ប្រឆាំងនឹងក្រុមហេគឃ័ររបស់កូរ៉េខាងជើង ពាក់ព័ន្ធក្នុងការអភិវឌ្ឍន៍ផ្កាយរណបរបស់កូរ៉េខាងជើង។ ក្រសួងការបរទេសកូរ៉េខាងត្បូងនៅថ្ងៃសុក្រ បានប្រកាសដាក់ការហាមឃាត់លើប្រតិបត្តិការហិរញ្ញវត្ថុ ប្រឆាំងនឹងក្រុមហេគឃ័រ Kimsuky។ ក្រសួងបាននិយាយថា Kimsuky ត្រូវបានគេដឹងថា បានផ្ញើអ៊ីមែលក្លែងបន្លំ ដែលមានប្រភពមកពីស្ថាប័នរដ្ឋាភិបាល ក្រុមជំនាញស្រាវជ្រាវ (think tanks) និងបណ្តាញព័ត៌មាន ដើម្បីលួចទិន្នន័យតាមរយៈឯកសារភ្ជាប់មេរោគ។ ព័ត៌មានដែលទទួលបានត្រូវបានគេជឿថា ត្រូវបានផ្តល់ឱ្យរដ្ឋាភិបាលកូរ៉េខាងជើង។
មន្ត្រីកូរ៉េខាងត្បូងបាននិយាយថា Kimsuky និងក្រុមហេគឃ័រកូរ៉េខាងជើងផ្សេងទៀត បានទទួលបច្ចេកវិទ្យាទំនើបលើអាវុធ ផ្កាយរណប និងបច្ចេកវិទ្យាអវកាសនៅទូទាំងពិភពលោក ដែលរួមចំណែកដល់ការអភិវឌ្ឍន៍ផ្កាយរណបរបស់ទីក្រុងព្យុងយ៉ាង។ ទីភ្នាក់ងារស៊ើបការណ៍សម្ងាត់ និងភ្នាក់ងារប៉ូលីសរបស់កូរ៉េខាងត្បូង ក៏បានចេញផ្សាយការប្រឹក្សាសន្តិសុខរួមគ្នាជាមួយក្រសួងការបរទេសសហរដ្ឋអាមេរិក និងការិយាល័យសហព័ន្ធស៊ើបអង្កេតផងដែរ។ វាផ្តល់ព័ត៌មានលម្អិតអំពីរបៀបដែល Kimsuky ប្រតិបត្តិការ និងអ្វីដែលអាចធ្វើបានដើម្បីបង្កើនសុវត្ថិភាពបណ្តាញ។ ក្រសួងការបរទេសកូរ៉េខាងត្បូង និយាយថា ការដាក់ទណ្ឌកម្មចុងក្រោយនេះ បង្ហាញពីការប្តេជ្ញាចិត្តរបស់ប្រទេស ក្នុងការធ្វើឱ្យប្រទេសកូរ៉េខាងជើង ទូទាត់សម្រាប់ការបង្កហេតុរបស់ខ្លួន៕
អត្ថបទ៖ លីដា
ប្រភព៖ រ៉យទ័រ
- Share This Post: