ហាមមិនឈ្នះ ឥឡូវអាជ្ញាធរចេញវិធានការក្តៅ តែហ៊ានយកសម្រាមទៅចោលនៅប្រឡាយបឹងត្របែកទៀត នឹងត្រូវពិន័យធ្ងន់កហើយ

នៅមុននេះបន្តិច រដ្ឋបាលខណ្ឌចំការមន បានចេញសេចក្តីជូនដំណឹងដល់បងប្អូនប្រជាពលរដ្ឋ និងបងប្អូនដែលប្រកបអាជីវកម្ម នៅតាមបណ្ដោយផ្លូវលេខ ១០៥ (ប្រឡាយបឹងត្របែក) និងជុំវិញតំបន់នេះ ស្ថិតនៅក្នុងសង្កាត់បឹងកេងកងទី២ សង្កាត់បឹងកេងកងទី៣ សង្កាត់ទួលទំពូងទី១ សង្កាត់បឹងត្របែក និងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ដោយធ្វើការសំណូមពរឲ្យប្រជាពលរដ្ឋវេចខ្ចប់សំរាមអោយបានត្រឹមត្រូវ និងទុកដាក់សំរាមនៅមុខផ្ទះរៀងៗខ្លួន ដោយមិនត្រូវយកសំរាមមកបោះចោលនៅតាមបណ្តោយប្រឡាយបឹងត្របែកនោះទៀតទេ។

ក្នុងករណីមិនរាងចាល និងមិនអនុវត្តតាមការណែនាំខាងលើ រដ្ឋបាលខណ្ឌនឹងមានវិធានផាកពិន័យទៅតាមច្បាប់កំណត់។ សូមបងប្អូនចូលរួមថែរក្សាសោភ័ណភាព របៀបរៀបរយក្នុងមូលដ្ឋាន ជាពិសេសតាមបណ្តោយផ្លូវលេខ ១០៥ (ប្រឡាយបឹងត្របែក) អោយបានស្រស់ស្អាត និងចៀសវាងពីការផាកពិន័យ។ ការចេញសេចក្តីជូនដំណឹងនេះ ក្រោយពេលដែលបងប្អូនប្រជាពលរដ្ឋជាច្រើននាក់តែងតែយកសម្រាមមកបោះចោលនៅតាមមាត់ប្រឡាយដោយមិនបានទុកដាក់នៅតាមផ្ទះរៀងៗខ្លួន។ ដោយទោះបីជាក្រុមការងារខណ្ឌចុះទៅអប់រំណែនាំ និងធ្វើកិច្ចសន្យាជារៀងរាល់ថ្ងៃ ប៉ុន្តែបងប្អូនប្រជាពលរដ្ឋនៅតែមិនបានចូលរួមយកចិត្តទុកដាក់៕ សូមអានសេចក្តីជូនដំណឹងនៅខាងក្រោម៖