សមត្ថកិច្ចឃាត់ខ្លួនក្រុមលីអូហោះ ដែលជាមុខសញ្ញាសេសសល់ចំនួន ០២នាក់ បន្ថែមទៀត ពាក់ព័ន្ធករណីហិ-ង្សា

យោងតាមការចុះផ្សាយរបស់ ស្នងការដ្ឋាននគរបាលរាជធានីភ្នំពេញ នៅថ្ងៃទី ៣ ខែធ្នូ ឆ្នាំ ២០២៤ នេះ បានឱ្យដឹងថា កាលពីថ្ងៃទី ០១ ខែធ្នូ ឆ្នាំ ២០២៤ វេលាម៉ោង ១២:០០នាទី កន្លងទៅ កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានធ្វើការស្រាវជ្រា និងឃាត់ខ្លួនក្រុមលីអូហោះ ដែលជាមុខសញ្ញាសេសសល់ចំនួន ០២នាក់ ពាក់ព័ន្ធករណីហិង្សាដោយចេតនា ដែលប្រព្រឹត្តទៅកាលពីថ្ងៃទី ២២ ខែមេសា ឆ្នាំ ២០២៤ វេលាម៉ោង ០៤:៣០ នាទី នៅចំណុច ផ្លូវបេតុង ភូមិ ព្រៃទា១ សង្កាត់ចោមចៅ៣ ខណ្ឌពោធិ៍សែនជ័យ។

ដោយឡែក សមត្ថកិច្ចក៏បានឃាត់ខ្លួនជនសង្ស័យទាំងពីររូបផងដែរ។ ក្នុងនោះជនសង្ស័យទី១ ឈ្មោះ សុខា ជ័យវន្ត័ ភេទប្រុស ហៅវន្ត័ និង ទី២ ឈ្មោះ សាន់ គីមហ៊ាង ហៅ អាស្វា។ ចំពោះបច្ចុប្បន្នជនសង្ស័យទាំងពីរ កំពុងឃាត់ខ្លួននៅការិយាល័យ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី៕

ប្រភព៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ