វេណេស៊ុយអេឡា រកឃើញអ្នកបាត់បង់ជីវិតដោយសារមេរោគ Hantavirus ចំនួន ៥ករណី

វេណេស៊ុយអេឡា៖ ក្រសួងសុខាភិបាលវេណេស៊ុយអេឡាបានជូនដំណឹងពីការរកឃើញអ្នកស្លាប់បាត់បង់ជីវិតដោយសារមេរោគ Hantavirus ចំនួន ៥ករណី នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃទី២២ ខែកក្កដា។ នៅក្នុងចំណោមករណីស្លាប់ទាំង ៥នោះ គឺមាន ៣ករណីបានកើតឡើងនៅក្នុងរដ្ឋ Anzoategui ភាគខាងកើត នៃប្រទេសវេណេស៊ុយអេឡា។

ប្រភពខាងលើបានបន្តថា ករណីស្លាប់ចំនួន ២ផ្សេងទៀតគឺត្រូវបានរកឃើញនៅក្នុងរដ្ឋ Barinas ដែលបានកើតឡើងចំពោះបុគ្គលិកសុខាភិបាលចំនួន ២នាក់ ហើយករណីឆ្លងមេរោគនិងស្លាប់នេះ គឺជាករណីដាច់ដោយឡែកមិនជាប់ពាក់ព័ន្ធជាមួយនឹងករណីឆ្លងមេរោគនិងស្លាប់ ដែលបានកើតឡើងនៅក្នុងរដ្ឋ Anzoategui នោះទេ។​ យ៉ាងណាក្តីអាជ្ញាធរសុខាភិបាលវេណេស៊ុយអេឡាបានបញ្ជាក់ថា ករណីឆ្លងនិងស្លាប់ដោយសារមេរោគ Hantavirus ទាំង ៥ករណីខាងលើនេះ មិនបានបង្កការរាតត្បាតចូលទៅក្នុងសហគមន៍នោះទេ៕

អត្ថបទ៖ ភក្តី

ប្រភព៖ The Strait Time