ចៅអធិការវត្តនៅប្រទេសថៃ ត្រូវបានប៉ូលិសឃាត់ខ្លួន ជុំវិញករណីកិបកេងលុយ ២,៨លានដុល្លារ និងប្រព្រឹត្តអនាចារជាមួយស្រីកំណាន់ក្នុងទីអារាម

ថៃ៖ ប៉ូលិសថៃបានឃាត់ខ្លួនព្រះសង្ឃជាន់ខ្ពស់មួយអង្គ ជុំវិញករណីកិបកេងថវិកាវត្តរាប់លានដុល្លារ និងមានរឿងអាស្រូវផ្លូវភេទក្នុងទីអារាម នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងរសៀលថ្ងៃទី១១ ខែកញ្ញា។ ព្រះសង្ឃអង្គនេះមានព្រះនាមថា Phra Wachirayan Wi មានព្រះជន្ម ៦៦ព្រះវស្សា និងមានតួនាទីជាព្រះចៅអធិការវត្ត Wat Phutthaisawan ក្នុងក្រុងអយុធ្យា អស់រយៈពេល ១៤ឆ្នាំមកហើយ។

ប្រភពខាងលើបានបន្តថា ប៉ូលិសថៃបានផ្តើមបើកការស៊ើបសង្កេតករណីខាងលើនេះចាប់តាំងពីពាក់កណ្តាលខែកក្កដាមកម្លេះ ហើយអ្វីដែលប៉ូលិសជំនាញបានរកឃើញកាលពីពេលថ្មីៗនេះរួមមាន៖

-ព្រះសង្ឃ Phra Wachirayan Wi បានកិបកេងថវិកាសម្រាប់ប្រាស់ក្នុងវត្តសរុបចំនួន ២,៨លានដុល្លារ

-ព្រះសង្ឃ Phra Wachirayan Wi បានធ្វើសកម្មភាពរួមភេទជាមួយស្រីកំណាន់អាយុ ៤៧ឆ្នាំម្នាក់នៅក្នុងវត្តជាច្រើនដង ខណៈស្រ្តីរូបនេះគឺជាអ្នកជួយបង្វែរសាច់ប្រាក់ (លាងលុយ) ចេញគណនីរបស់វត្តទៅកាន់គណនីឯកជនក្រោមរូបភាពបន្លំផ្សេងៗជាច្រើនទម្រង់

សូមបញ្ជាក់ថា ស្រ្តីវ័យ ៤៧ឆ្នាំ ដែលមិនត្រូវបានគេបង្ហាញឈ្មោះពិតរូបនេះ ក៏ត្រូវបានប៉ូលិសឃាត់ខ្លួនផងដែរ ខណៈទំហំទោសនៃបទល្មើសខាងលើនេះនៅមិនទាន់មានការបញ្ជាក់នៅឡើយទេ៕

អត្ថបទ៖ ភក្តី

ប្រភព៖ The Strait Time