សម្តេចធិបតី ហ៊ុន ម៉ាណែត បញ្ជាឱ្យគ្រប់ស្ថាប័នពង្រឹងការងារសង្គ្រោះបន្ទាន់ និងត្រៀមបង្ការគ្រោះទឹកជំនន់ជាអាទិភាព

(រាជធានីភ្នំពេញ)៖ យោងទៅតាមការចុះផ្សាយរបស់ ក្រសួងព័ត៌មាន នៅថ្ងៃទី ២៦ ខែកញ្ញា ឆ្នាំ ២០២៦ បានឱ្យដឹងថា ក្នុងកិច្ចប្រជុំពេញអង្គគណៈរដ្ឋមន្ត្រី នាថ្ងៃទី ២៥ ខែកញ្ញា ឆ្នាំ ២០២៦ សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់បទបញ្ជាយ៉ាងម៉ឺងម៉ាត់ដល់គ្រប់ស្ថាប័នពាក់ព័ន្ធ ឱ្យយកចិត្តទុកដាក់ខ្ពស់លើការជួយសង្គ្រោះប្រជាពលរដ្ឋពីគ្រោះទឹកជំនន់ ដោយចាត់ទុកអាយុជីវិតប្រជាពលរដ្ឋជាអាទិភាពចម្បង។

សម្តេចធិបតី បានណែនាំឱ្យគណៈកម្មាធិការជាតិគ្រប់គ្រងគ្រោះមហន្តរាយ សហការជាមួយរដ្ឋបាលរាជធានី-ខេត្ត បន្តតាមដានស្ថានការណ៍ឱ្យបានជាប់លាប់ និងកំណត់ទីតាំងសុវត្ថិភាពសម្រាប់ជម្លៀសប្រជាពលរដ្ឋឱ្យបានទាន់ពេលវេលា។ ទន្ទឹមនឹងនេះ កងកម្លាំងប្រដាប់អាវុធគ្រប់ប្រភេទ ត្រូវត្រៀមលក្ខណៈទាំងកម្លាំង និងមធ្យោបាយ ដើម្បីចុះជួយអន្តរាគមន៍សង្គ្រោះប្រជាពលរដ្ឋនៅគ្រប់តំបន់។

ដោយឡែក ក្រសួងធនធានទឹក និងឧតុនិយម ត្រូវបន្តតាមដាន និងព្យាករណ៍អាកាសធាតុឱ្យបានញឹកញាប់ រួចជូនដំណឹងដល់សាធារណជន ជាពិសេសអ្នករស់នៅតំបន់ងាយរងគ្រោះ និងប្រជានេសាទនៅសមុទ្រ ដើម្បីបង្ការហានិភ័យដែលអាចកើតមានឡើងចំពោះអាយុជីវិតមនុស្ស សត្វពាហនៈ និងទ្រព្យសម្បត្តិ។

ក្នុងឱកាសនោះ សម្តេចធិបតី ក៏បានថ្លែងអំណរគុណចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងកម្លាំងជំនាញទាំងអស់ ដែលបានចុះជួយប្រជាពលរដ្ឋរងគ្រោះដោយទឹកជំនន់នាពេលកន្លងមក៕

ប្រភព៖ ក្រសួងព័ត៌មាន