បើដូចការគ្រោងទុក ផលិតកម្ម Galaxy Navatra នឹងធ្វើពិធីទទួលស្វាគមន៍កំពូលតារាចម្រៀង ព្រាប សុវត្ថិ ចូលផលិតកម្មរបស់ខ្លួននៅល្ងាចនេះដែលកម្មវិធីនឹងធ្វើឡើងនៅសណ្ឋាគារ Garden City ជិតវិមានឈ្នះឈ្នះ ដោយនឹងមានការចូលរួមពីសំណាក់អ្នកសិល្បៈជាច្រើន ដែលបានអញ្ជើញតាមលិខិត។ ខណៈដែលតារាចម្រៀង ព្រាប សុវត្ថិ នឹងត្រូវបានគេរៀបចំពិធីទទួលស្វាគមន៍យ៉ាងកក់ក្តៅនោះ តារាចម្រៀង ខេម ដែលកំពុងច្រៀងនៅផលិតកម្ម Galaxy ដូចគ្នានោះ នឹងត្រូវចូលខ្លួនទៅដោះស្រាយជាមួយផលិតកម្ម ថោន ដែលអះអាងថា ខេម បានបំពានកិច្ចសន្យា។

បើយោងទៅតាមលិខិតផ្លូវការរបស់ផលិតកម្ម ថោន បានអោយតារាចម្រៀង ខេម មកចូលខ្លួនដោះស្រាយនិងពន្យល់អោយច្បាស់លាស់ចំពោះការបំពានកិច្ចសន្យាទៅច្រៀងអោយផលិតកម្មផ្សេង ទាំងដែលរូបលោកនៅជាប់កុងត្រាជាមួយ ថោន រហូតដល់ចុងខែធ្នូ ឆ្នាំ២០២០នេះ។ មហាជនកំពុងរង់ចាំមើលថា តើតារាចម្រៀង ខេម នឹងមានការដោះស្រាយយ៉ាងណាជាមួយផលិតកម្ម ថោន ?