អ្នកប្រើ iPhone ទាំងអស់គួរតែដឹង! នេះគឺជាការផ្លាស់ប្ដូរ 5ចំណុចក្នុងប្រព័ន្ធដំណើរការ iOS 11.4

ទីបំផុត iOS 11.4 ត្រូវបានប្រកាសជាផ្លូវការហើយ ដែលមានភ្ជាប់មកជាមួយនឹងមុខងារថ្មីៗជាច្រើន និងអភិវឌ្ឍន៍លើផលិតផលស៊េរីខ្ពស់របស់ក្រុមហ៊ុន Apple។ ដោយឡែក សម្រាប់ iOS ជំនាន់ថ្មីនេះគឺជាការអភិវឌ្ឍតិចតួច បើធៀបទៅនឹង iOS 11.3 ប៉ុន្ដែវាក៏នាំយកមកជាមួយនូវការផ្លាស់ប្ដូរ 5ចំណុចធំៗផងដែរ។

1/ កម្មវិធី Messages នៅក្នុ iCloud

ចំពោះមុខងារថ្មីនេះ គឺអនុញ្ញាតឲ្យអ្នករក្សាទុក iMessages នៅក្នុង iCloud បាន ពោលគឺបើទោះជាអ្នកផ្លាស់ប្ដូរ iPhone ប្រើ ក៏សារទាំងនោះមិនបាត់ដែរ។ ដើម្បីបើកមុខងារនេះ សូមចូលទៅកាន់ Setting -> ចុចលើពាក្យថា Apple ID -> iCloud រួចបើកមុខងារ Messages -> ចូលទៅកាន់មីនុយដើមវិញ -> បើកកម្មវិធី Messages រួចធ្វើតាមការណែនាំ។

2/ Wallpaper ថ្មី

សម្រាប់ផលិតផល iPhone 8 និង iPhone 8 Plus ពណ៌ក្រហម គឺមាន Wallpaper ផ្ទាល់ខ្លួន ដែលគ្មាននរណាដូច ប៉ុន្ដែជាមួយនឹងប្រព័ន្ធដំណើរការ iOS ថ្មី Wallpaper ទាំងនោះត្រូវបានដាក់ឲ្យប្រើប្រាស់លើគ្រប់ iPhone ទាំងអស់តែម្ដង។ ដើម្បីប្រើមុខងារនេះសូមចូលទៅកាន់ Settings -> Wallpaper -> ជ្រើសយក Wallpaper ណាមួយដែលអ្នកស្រលាញ់ រឺងាយស្រួលបំផុត គឺទាញយក Wallpaper ក្នុងអត្ថបទនេះរួចដាក់វាលើអេក្រង់តាមរយៈកម្មវិធី Photos។

3/ AirPlay 2, HomePod Stereo

AirPlay 2 អនុញ្ញាតឲ្យអ្នកគ្រប់គ្រងលើអូឌីយ៉ូបានច្រើន ហើយសម្រាប់ពេលនេះ អ្នកប្រើប្រាស់អាចចាក់តន្ត្រីនៅក្នុងបន្ទប់តែមួយ រឺផ្សេងទៀតក្នុងពេលដំណាលគ្នា។ លើសពីនេះទៅទៀត អ្នកប្រើប្រាស់ក៏អាចហៅ Siri ឲ្យចាក់តន្ត្រីក្នុងបន្ទប់ណាមួយដែលអ្នកចូលចិត្តផងដែរ។

4/ អាចប្រើប្រាស់មុខងារ ClassKit បាន

ClassKit គឺជាមុខងារពិសេសមួយសម្រាប់គ្រូបង្រៀន ក្នុងការគ្រប់គ្រងសិស្ស ហើយសិស្សក៏អាចគ្រប់គ្រងលើកិច្ចការសាលាជាមួយនឹងកម្មវិធី Schoolwork នៅលើ iPad បានផងដែរ។ យោងតាមក្រុមហ៊ុន Apple មុខងារ ClassKit នេះអាចជួយឲ្យគ្រូបង្រៀនគ្របដណ្ដប់លើសកម្មភាពសិស្ស និងអាចណែនាំឲ្យសិស្សធ្វើសកម្មភាពណាមួយដោយគ្រាន់តែចុចម្ដងប៉ុណ្ណោះ។

5/ ជួសជុលលើភាពអសកម្ម និងអភិវឌ្ឍន៍លើដំណើរការ

iOS 11.4 ត្រូវបានក្រុមហ៊ុន Apple ជួសជុលលើបញ្ហានានាដែលកើតមានលើប្រព័ន្ធដំណើរការចាស់ ដូចជាមេរោគ Black-dot ជាដើម។ ដូចនេះ សម្រាប់អ្នកដែលមិនចង់ប្រឈមមុខនឹងបញ្ហានានា គឺគ្រាន់តែ Update យកប្រព័ន្ធដំណើរការថ្មីនេះជាការស្រេច។

Fu

ប្រភព៖ idropnews