ថវិកាសប្បុរសជន ចូលរួមជួយប្រជាជនក្នុងគ្រោះជំនន់ទឹកភ្លៀង តាមរយៈសម្តេចតេជោ កើនដល់ជិត៧ លានដុល្លារ, ប្រាក់រៀល ជាង៣៩៦លាន និង ៥.០០០€ (ប្រាំពាន់អឺរ៉ូ)

រាជធានីភ្នំពេញ៖ តាមការចុះផ្សាយរបស់ ក្រសួងព័ត៌មាន បានឲ្យដឹងថា យោងតាមបណ្តាញទំនាក់ទំនងសង្គមហ្វេសប៊ុក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា គិតត្រឹមម៉ោង ២និង៤០នាទីរសៀល ថ្ងៃ១៩ ខែតុលា ឆ្នាំ២០២០នេះ ថវិកាសប្បុរសជន ដែលបានចូលរួមជួយប្រជាជនក្នុងគ្រោះជំនន់ទឹកភ្លៀង តាមរយៈសម្តេចតេជោ កើនដល់៦,៩០៦,៥២៤ ដុល្លារ, ប្រាក់រៀល ៣៩៦,៥២៥,០០០ លាន និង ៥.០០០€ (ប្រាំពាន់អឺរ៉ូ)។

នៅបណ្តាញសង្គមហ្វេសប៊ុក សសម្តេចតេជោបានបញ្ជាក់ ថវិកាទាំងនោះ បានមកពីសប្បុរសជនចំនួន ១៥៣នាក់។ ជាមួយគ្នានោះ សម្តេចតេជោ បានថ្លែងអំណរគុណចំពោះសប្បុរសជន ដែលបានចូលរួមជួយប្រជាជនក្នុងគ្រោះជំនន់ទឹកភ្លៀង ដែលកំពុងកើតមាននៅក្នុងប្រទេស។

សម្តេចតេជោនាយករដ្ឋមន្ត្រី បានបញ្ជាក់ថា ថវិកាដែលសប្បុរសជនចូលរួមនេះ នឹងចាត់ចែងជួយសង្រ្គោះបន្ទាន់ តាមរយៈគណៈកម្មាធិការជាតិគ្រប់គ្រងគ្រោះមហន្តរាយ។ ក្នុងករណីយមានសប្បុរសជន ចង់ចូលរួមបន្ថែមទៀត សម្តេចតេជោ បានណែនាំឲ្យបងប្អូន ទាក់ទងលោក សេង ទៀង រដ្ឋលេខាធិការទីស្តីការ គណៈរដ្ឋមន្ត្រី។ ​សម្តេចបានរំលេចនូវពាក្យស្លោកមួយថា “ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក” ៕

ប្រភព៖ ក្រសួងព័ត៌មាន