ឥឡូវនេះ សម្រាប់អ្នកប្រើប្រាស់ Galaxy S8 ក្នុងប្រទេសមួយចំនួននេះ អាច Update Android Oreo បានហើយ!

កាលពីប៉ុន្មានសប្ដាហ៍មុន ក្រុមហ៊ុន Samsung បានសម្រេចដាក់ឲ្យអតិថិជនមួយចំនួនដែលកំពុងប្រើប្រាស់ស្មាតហ្វូន Galaxy S8 Update យកប្រព័ន្ធដំណើរការថ្មី Android Oreo ដើម្បីជួសជុលដល់ភាពអសកម្មមួយចំនួន និងកែប្រែលើប្រព័ន្ធដំណើរការមួយចំនួនធំផងដែរ។ ដោយឡែក ចំពោះការអភិវឌ្ឍនេះត្រូវបានធ្វើឡើងសម្រាប់តែប្រទេសអាល្លឺម៉ង់ ប៉ុណ្ណោះ តែមកដល់ឥឡូវ យើងសង្កេតឃើញថាការអភិវឌ្ឍនេះត្រូវបានពង្រីកបន្ថែមទៅកាន់បណ្ដាប្រទេសផ្សេងៗទៀតហើយ។

ចំពោះប្រទេសដែលមានសំណាងបន្ទាប់ពីអាល្លឺម៉ង់គឺមានដូចជា ឥណ្ឌា ប៉ូឡូញ និងមួយចំនួនផ្សេងទៀតដែលស្ថិតក្នុងតំបន់ណ័រឌិក។ សម្រាប់ទំហំទាញយក គឺប្រមាណជា 530MB សម្រាប់ប្រទេសអាល្លឺម៉ង់ ជាមួយនឹង Firmware version G950FXXU1CRB7 និង G955XXU1CRB7។ ក្រោយមកទៀត យើងសង្កេតឃើញថា បណ្ដាប្រទេសមួយចំនួនផ្សេងទៀតដូចជា បារាំង អេស៉្បាញ ក៏ទទួលបានការអភិវឌ្ឍ Android Oreo សម្រាប់ Galaxy S8 និង S8+ ដែរ។ ចំពោះការអភិវឌ្ឍនេះ គឺបានដោះស្រាយលើបញ្ហាគាំង រលត់ និងភាពអសកម្មជាច្រើនទៀតឲ្យមានភាពប្រសើរឡើងវិញ។

គួរបញ្ជាក់ផងដែរថា សម្រាប់ប្រទេសកម្ពុជាយើង ក្រុមហ៊ុន Samsung នៅមិនទាន់សម្រេចដាក់ឲ្យទាញយកនោះទេ។ ប៉ុន្ដែមិនយូរទៀតឡើយ អតិថិជនដែលជាម្ចាស់ Galaxy S8 និង S8+ ពិតជាទទួលបានបទពិសោធន៍ថ្មីនេះជាក់ជាមិនខាន។ ទោះជាយ៉ាងណា ក្រុមហ៊ុនបាននឹងកំពុងព្យាយាមយ៉ាងអស់ពីលទ្ធភាពហើយ។

Fu

ខ្មែរណូត

ប្រភព៖ sammobile