រយៈពេលតែ១យប់ អាជ្ញាធរនៅខណ្ឌចំនួន២ ឃាត់បានម៉ូតូ និងរថយន្តជាង៣០គ្រឿង ដែលបំពានបម្រាមគោចរ យកទៅរក្សាទុកអធិការនគរបាលខណ្ឌ
យោងតាមការចុះផ្សាយពី BTV Cambodia បានឲ្យដឹងថា អាជ្ញាធរខណ្ឌទួលគោកបានប្រាប់នៅព្រឹកថ្ងៃទី០៣ ខែមេសា ឆ្នាំ២០២១នេះថា កាលពីយប់ថ្ងៃទី០២ ឈានចូលថ្ងៃទី០៣ ខែមេសា គិតចាប់ពីវេលាម៉ោង២០យប់ ដល់ម៉ោង០៥ភ្លឺ កម្លាំងគណៈបញ្ជាឯកភាពសាលាខណ្ឌបានអនុវត្តវិធានការដ្ឋបាលជាបណ្តោះអាសន្នរយៈពេល២សប្ដាហ៍ ដើម្បីទប់ស្កាត់ការរីករាលដាលនៃជំងឺកូវីដ-19 ក្នុងភូមិសាស្រ្តរាជធានីភ្នំពេញ ដែលមានពីរគោលដៅ គោលដៅទី1 ត្រង់ចំណុចផ្លូវ245កែង182 ក្នុងសង្កាត់ទឹកល្អក់ទី3 និងគោលដៅទី2ត្រង់លើផ្លូវ315 កែងផ្លូវ592 ក្នុងសង្កាតបឹងកក់ទី2 ខណ្ឌទួលគោក។
អាជ្ញាធរខណ្ឌទួលគោកបញ្ជាក់ថា ជាលទ្ធផលត្រួតពិនិត្យនៅពេលយប់នោះ គឺសមត្ថកិច្ចបានឃាត់ម៉ូតូចំនួន16គ្រឿង និងឃាត់រថយន្តចំនួន4គ្រឿង សរុបចំនួន20គ្រឿងយកទៅរក្សាទុកនៅអធិកាដ្ឋាននគរបាលខណ្ឌទួលគោកជាបណ្តោះអាសន្ន ចំពោះមនុស្សគឺបានអប់រំ រួចអនុញ្ញាតឱ្យទៅលំនៅឋានវិញ។
ចំណែកឯ នៅក្នុងមូលដ្ឋានខណ្ឌពោធិសែនជ័យ មាន២គោលដៅ ដែលបានចុះអនុវត្តវិធានការរដ្ឋបាលរបស់សាលារាជធានីភ្នំពេញ ពិសេសទាក់ទិននឹងបំរាមគោចរពេលរាត្រី ដែលគោលដៅទី១នៅមុខសាលាវិទ្យាល័យជម្ពូវ័ន មិនមានដកហូតមធ្យោបាយធ្វើដំណើរទេ។
ហើយនៅគោលដៅទី២ គឺលើផ្លូវចោមចៅ ឬផ្លូវវេងស្រេង មានដកហូតម៉ូតូចំនួន១៣គ្រឿងមករក្សាទុកជាបណ្តោះអាសន្ន នៅអធិការនគរបាលខណ្ឌ។ ក្រៅពីនេះ មានតែរថយន្តធំៗ រថយន្តដឹកទំនិញ បងប្អូនអញ្ជើញមកពេទ្យ រថយន្តរបស់អង្គទូត អង្គការ និងបងប្អូនកម្មករ កម្មការិនី ដែលចេញមកពីបម្រើការងារមានកាត និងលិខិតស្នាមត្រឹមត្រូវ បានអនុញ្ញាតឲ្យធ្វើចរាចរណ៍ជាធម្មតា៕
