បើតាមការបង្ហោះសារនៅលើ Facebook របស់លោក ហេង ឡុង ប្រធានសមាគមន៍មិត្តសិល្បៈស្ម័គ្រចិត្តជួយសង្គម នៅមុននេះបន្តិចបានអោយដឹងថា កញ្ញា មាន ពេជ្ររីតា ត្រូវបានបញ្ជូនទៅឃុំខ្លួននៅពន្ធនាគារ តាមដីកាឃុំខ្លួនលេខ “៣២៣៩”។ លោក ហេង​ ឡុង បានរៀបរាប់ថា៖ “បញ្ជូនកញ្ញាម៉ូដែលឈ្មោះ មាន ពេជ្រវីតា ទៅពន្ធនាគារ! យោងតាមដីកាបង្គាប់ឲ្យឃុំខ្លួនលេខ៖ ៣២៣៩ “ប” ដឃដ ចុះថ្ងៃទី១១ ខែឧសភា ឆ្នាំ២០២១ ដោយចៅក្រមស៊ើបសួរ លោក កូយ សៅ នៃសាលាដំបូងរាជធានីភ្នំពេញ បានបញ្ជូនកញ្ញាម៉ូដែលឈ្មោះ មាន ពេជ្រវីតា ទៅពន្ធនាគារ ឬមណ្ឌលឃុំខ្លួន (ម២)។ ខ្ញុំបាទក្នុងនាមសមាគមសិល្បករខ្មែរ កំពុងតែធ្វើការជាមួយនឹងមេធាវីស្ម័គ្រចិត្តការពារក្ដីជូនជនរងគ្រោះ។ ខ្ញុំបាទនឹងជូនព័ត៌មានថ្មីដល់បងប្អូនដែលស្រឡាញ់គាំទ្រភាពយុត្តិធម៌សម្រាប់ជនរងគ្រោះ”

គួរបញ្ជាក់ផងដែរថា កញ្ញា មាន ពេជ្ររីតា ហៅយូប៊ី ត្រូវបានឧកញ៉ា ហេង សៀ ប្តឹងពីបទលួចទូរស័ព្ទដៃ និងប្រើប្រាស់ហឹង្សាមកលើរូបអោយរងរបួស ខណៈដែលរូបនាងបានប្តឹងឧកញ៉ា ហេង សៀ ថាបានប៉ុនប៉ងរំលោភ។ មហាជនរង់ចាំមើលថា តើរឿងនេះនៅទៅជាយ៉ាងណា? សូមរង់ចាំតាមដានទាំងអស់គ្នា៕