តើអ្នកត្រៀមខ្លួនរួចហើយ រឺនៅសម្រាប់ iPhone ជំនាន់ថ្មីៗ? ជាការពិតណាស់ ក្រុមហ៊ុនបច្ចេកវិទ្យាខ្នាតយក្ស Apple គ្រោងនឹងប្រកាសចេញលក់ស្មាតហ្វូនរបស់ខ្លួនជាច្រើន ហើយក្នុងនោះក៏មានមួយដែលគេជឿថាជាម៉ូដែលកំពូលផងដែរ។ ទាក់ទងទៅនឹងម៉ូដែលកំពូលនេះ គេហទំព័រ Bloomberg បានលើកឡើងថា នឹងមានទំហំប៉ុន iPhone X ហើយមានតម្លៃធូថ្លៃជាង ប៉ុន្ដែវាអាចនឹងមិនមែនជាការពិតឡើយ។

គួរបញ្ជាក់ផងដែរថា សម្រាប់ពេលនេះក្រុមហ៊ុន Apple កំពុងបើកធ្វើការតេស្តសាកល្បងលើ iPhone កំពូលនេះហើយជាមួយនឹងក្រុមហ៊ុនផ្គត់ផ្គង់របស់ខ្លួន ប៉ុន្ដែគេហទំព័រ Bloomberg បានបន្ដថា ម៉ូដែលថ្មីនេះនឹងទទួលបានការផ្លាស់ប្ដូរដ៏គួរឲ្យកត់សម្គាល់មួយចំនួន។ ក្រុមហ៊ុន Apple ពិតជាយល់ច្បាស់ពីអ្វីដែលអតិថិជនចង់បាន ពោលគឺសម័យនេះមនុស្សភាគច្រើនចូលចិត្តប្រើប្រាស់ស្មាតហ្វូនទាំងឡាយណាដែលមានអេក្រង់ធំ រឺអាចហៅថា Phablet។ ដូចនេះ សម្រាប់ iPhone ជំនាន់ថ្មីដែលជាម៉ូដែលកំពូលត្រូវបានគេជឿថាមានទំហំអេក្រង់រហូតដល់ទៅ 6.5 អ៊ីញឯណោះ ជាមួយនឹងឈ្មោះកូដថា D33។

តាមរយៈរូបភាពខាងលើនេះ អាចឲ្យយើងសន្មត់បានថា នេះពិតជា iPhone ដែលមានទំហំអេក្រង់ធំជាងគេក្នុងប្រវត្តិសាស្ត្រមែន ហើយរូបភាពនេះគឺទទួលបានពីគេហទំព័រ MacX ដែលក្រោយមកត្រូវបានលុបចោលវិញ។ យោងតាមគេហទំព័រ MacRumors វិញក៏បានលើកឡើងដែរថា សម្រាប់រូបភាពទំហំអេក្រង់នេះត្រូវបានគេជឿថា ជាម៉ូដែល iPhone X Plus។

សម្រាប់រូបរាងរបស់ D33 អាចនឹងមានទំហំប៉ុនទៅនឹង iPhone 8 Plus ប៉ុន្ដែមានរចនាបទគ្មានគែម ដែលធ្វើឲ្យរូបរាងរបស់ iPhone នោះកាន់តែធំ បើធៀបទៅនឹង iPhone X ដែលមានទំហំត្រឹម 5.8 អ៊ីញប៉ុណ្ណោះ។ អ្វីដែលគួរឲ្យចាប់អារម្មណ៍បំផុតនោះគឺ iPhone ថ្មីដែលមានទំហំធំជាងគេនេះ នឹងត្រូវបានដំណើរការដោយ iOS 12 ហើយមានភ្ជាប់មកជាមួយនឹងបច្ចេកវិទ្យា AR, Siri ជំនាន់ថ្មី កម្មវិធីថែរក្សាសុខភាព Animoji ថ្មី និងកម្មវិធី​ FaceTime ថ្មីផងដែរ។

Fu

ប្រភព៖ dialymail