បើតាមការចុះផ្សាយរបស់សារព័ត៌មានបច្ចេកវិទ្យា MacRumors បានរាយការណ៍ថា ក្រុមហ៊ុន Apple បានដាក់បង្ហាញនូវក្រណាត់ជូតមួយប្រភេទ ឬហៅថា Polishing Cloth ដែលមានតម្លៃ ១៩ដុល្លារ ហើយក្រណាត់នេះផងដែរ គឺចេញមកដំណាលគ្នាជាមួយ MacBook Pro ស៊េរីថ្មីទំហំ 14 និង 16 អ៊ីញ ផ្ទាល់តែម្ដង។ វាគឺជាក្រណាត់ជូត ដែលសាកសមបំផុតសម្រាប់ឧបករណ៍របស់ Apple ព្រោះថាវាផលិតពី «វត្ថុធាតុទន់ មិនមានកម្ទេចសរសៃ» ហើយក៏ល្អសម្រាប់កញ្ចក់ nano-texture របស់ក្បាលម៉ូនីទ័រ Pro Display XDR ។ វាក៏ស័ក្តិសមសម្រាប់ប្រើជាមួយអេក្រង់ខ្នាតតូច LED របស់ MacBook Pro ស៊េរីថ្មី និងគ្រប់ស្មាតហ្វូន iPhone, iPads និង Macs ។

យ៉ាងណាក៏ដោយ ក្រណាត់ជូតមួយនេះមិនទាន់មានលក់នៅតាមទីផ្សារនៅឡើយទេ ដោយយើងអាចបញ្ជាត្រឹមទិញតាមរយៈវេបសាយរបស់ក្រុមហ៊ុន Apple តែប៉ុណ្ណោះ ហើយអតិថិជននឹងត្រូវរង់ចាំរហូតដល់ថ្ងៃទី១៨ ទៅ ២៤ ខែវិច្ឆិកា ឯណោះ។ ក្រុមហ៊ុន Apple បានណែនាំឱ្យអ្នកប្រើប្រាស់ឧបករណ៍របស់ខ្លួន ប្រើប្រាស់ក្រណាត់ដែលគ្មានសរសៃរឹង ដើម្បីសម្អាតធម្មតាលើឧបករណ៍របស់ពួកគេ ហើយត្រូវប្រើអាល់កុលអ៊ីសូប្រូភីល ៧០% បន្ថែមទៀតដើម្បីផ្សើមក្រណាត់ សម្រាប់ការសម្អាតជ្រៅៗ និងពេញលេញ។ ទីតាំងដែលអាចបញ្ជាទិញក្រណាត់ Polishing Cloth ទំនងជានឹងចេញមកដំណាលគ្នាជាមួយការបង្ហាញ MacBook Pro នៅសប្ដាហ៍ក្រោយនេះ៕

អត្ថបទ៖ លីដា
ប្រភព៖ MacRumors