មន្ដ្រីជំនាញបញ្ជាក់ថា រយៈពេល ២ថ្ងៃហើយ ដែលអាជ្ញាធររាជធានីភ្នំពេញ សម្រេចបើកឱ្យដំណើរការបណ្ដោះអាសន្ននូវផ្លូវក្រោមដីចោមចៅមួយខ្សែទៀត ដើម្បីជួយសម្រួលចរាចរណ៍

អាជ្ញាធររាជធានីភ្នំពេញ បានសម្រេចបើកឱ្យដំណើរការផ្លូវក្រោមដីមួយខ្សែទៀត ជា បណ្តោះអាសន្ន នៅចំណុចការដ្ឋានសាងសង់ស្ពានអាកាស និងផ្លូវក្រោមដីចោមចៅ ដើម្បី ជួយសម្រួលចរាចរណ៍ ពីមហាវិថីចោមចៅឆ្ពោះទៅផ្លូវជាតិលេខ៤ ខណៈដែលក្រុមការ ងារកំពុងដំណើរការអ៊ុតកៅស៊ូ តភ្ជាប់ពីមហាវិថីសហព័ន្ធរុស្ស៊ី ឆ្ពោះទៅផ្លូវជាតិលេខ៤ និងផ្លូវ តភ្ជាប់ពីមហាវិថីចោមចៅឆ្ពោះ ទៅមហាវិថីសហព័ន្ធរុស្ស៊ី ក្នុងរយៈពេល១៤ថ្ងៃនោះ។ នេះបើ តាមការបញ្ជាក់ឱ្យដឹងពីមន្ត្រីជំនាញរបស់សាលារាជធានីភ្នំពេញ នៅថ្ងៃទី០៨ ខែវិច្ឆិកា ឆ្នាំ២០២១នេះ។

មន្ត្រីជំនាញរូបនោះបន្ដថា មូលហេតុដែលអាជ្ញាធររាជធានីភ្នំពេញសម្រេចបើកផ្លូវ ក្រោមដីបណ្ដោះអាសន្ន១ខ្សែរយៈពេល២ថ្ងៃមកនេះ គឺដើម្បីជួយសម្រួលការកកស្ទះ ចរាចរណ៍ ក្នុងពេលរអ៊ុតកៅស៊ូលើកំណាត់ផ្លូវដែលតភ្ជាប់ពីមហាវិថីសហព័ន្ធរុស្ស៊ីទៅផ្លូវជាតិ លេខ៤ និងផ្លូវតភ្ជាប់ពីមហាវិថីចោមចៅទៅមហាវិថីសហព័ន្ធរុស្ស៊ី។ ការដ្ឋានសាងសង់ស្ពាន អាកាស និងផ្លូវក្រោមដីចោមចៅ បានធ្វើការពង្វាងចរាចរណ៍រយៈពេល ១៤ថ្ងៃ ដោយបើកឱ្យ ប្រើប្រាស់ផ្លូវក្រោមដីថ្មីជាបណ្តោះអាសន្នពីមហាវិថីចោមចៅ ទៅផ្លូវជាតិលេខ៤។ ស្ពាន អាកាស និងផ្លូវក្រោមដីចោមចៅ ជាគម្រោងរបស់រាជរដ្ឋាភិបាលកម្ពុជា តាមរយៈសាលា រាជធានីភ្នំពេញ ដោយទទួលម៉ៅការសាងសង់ដោយក្រុមហ៊ុនវិនិយោគទុនអាណិកជន កម្ពុជា(OCIC) ដោយប្រើប្រាស់ការសាងសង់ក្នុងរយៈពេល៣០ខែ និងចំណាយថវិកា សាងសង់ប្រមាណ២២លានដុល្លារអាម៉េរិក។

មន្ត្រីជំនាញរូបនោះបន្ដទៀតថា ដោយផ្អែកតាមលក្ខណៈបច្ចេកទេសរបស់មន្ទីរ សាធារណការ និងដឹកជញ្ជូនរាជធានីភ្នំពេញ ការដ្ឋាននេះ ត្រូវសាងសង់ដោយបែង ចែកជា៣ ផ្នែកគឺ៖ ស្ពានទី១. ជាស្ពានអាកាសមេតភ្ជាប់ចរាចរណ៍ពីមហាវិថីសហព័ន្ធរុស្ស៊ី មកផ្លូវជាតិ លេខ៣ មានប្រវែងសរុប ៤០៨ម៉ែត្រ ទទឹង១៥,៨ម៉ែត្រ ដែលមានចរាចរណ៍ពីរគន្លងទៅនឹង ពីរគន្លងមកជម្រាលស្ពាន៤,៥ម៉ែត្រ និងមានកម្ពស់អតិបរមា ដែលអាចចរាចរណ៍ក្រោម ស្ពានមាន៥,៥ម៉ែត្រ។

ស្ពានទី២. បំបែកចេញពីស្ពានអាកាសមេ បត់ឆ្វេងតភ្ជាប់ចរាចរណ៍ ពីមហាវិថីសហព័ន្ធរុស្ស៊ីឆ្ពោះទៅផ្លូវវេងស្រេង សម្រាប់ចរាចរណ៍មួយទិស ដែលមានមួយ គន្លងរថយន្ត និងមួយគន្លងទោចក្រយានយន្ត មានប្រវែងសរុប២០២ម៉ែត្រ (ស្ពានអាកាស ប្រវែង៤០ម៉ែត្រ ផ្លូវក្រោមដី ប្រវែង ១១៨ម៉ែត្រ និងផ្លូវលើដីប្រវែង ៤៤ម៉ែត្រ) ទទឹង៥,២៥ម៉ែត្រ និងស្ពានទី៣. ជាស្ពានកោងបត់ឆ្វេងតភ្ជាប់ចរាចរណ៍ពីផ្លូវវេងស្រេង មកផ្លូវជាតិលេខ៣ មានប្រវែងសរុប ២០៦ម៉ែត្រ (ស្ពានអាកាស ប្រវែង៦០ម៉ែត្រ ផ្លូវក្រោមដីប្រវែង១១៨ម៉ែត្រ និងផ្លូវលើដីប្រវែង២៨ម៉ែត្រ) ទទឹង៥,២៥ម៉ែត្រ សម្រាប់ចរាចរណ៍មួយទិស ដែលមាន មួយគន្លងរថយន្ត និងមួយគន្លងទោចក្រយានយន្ត។

ស្ពានអាកាស និងផ្លូវក្រោមដី ជាផ្លូវ កោងតភ្ជាប់ចរាចរណ៍ពីផ្លូវវេងស្រេង មកផ្លូវជាតិលេខ៤ មានប្រវែងសរុប ១៣០ម៉ែត្រ (ជាផ្លូវ ក្រោមដីប្រវែង១៣ម៉ែត្រ និងផ្លូវលើដីប្រវែង១១៧ម៉ែត្រ) ទទឹង ៨,៥ម៉ែត្រ សម្រាប់ ចរាចរណ៍មួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។ ផ្លូវលើផ្ទៃដី ជាផ្លូវមេ តភ្ជាប់ចរាចរណ៍ពីផ្លូវជាតិលេខ៤ មកផ្លូវវេងស្រេង មានប្រវែងសរុប ២៣៥ម៉ែត្រ ទទឹង៨,៥ម៉ែត្រ សម្រាប់ចរាចរណ៍មួយទិស ដែលមានពីរគន្លងរថយន្ត និងមួយគន្លង ទោចក្រយានយន្ត។

ផ្លូវក្រោមដី ជាផ្លូវតភ្ជាប់ចរាចរពីផ្លូវជាតិលេខ៤ មកមហាវិថីសហ ព័ន្ធរុស្ស៊ី ដែលមានប្រវែងសរុប ៤៧០ម៉ែត្រ ទទឹង៨,៥ម៉ែត្រ សម្រាប់ចរាចរណ៍មួយទិស ដែលមានពីរគន្លងរថយន្ត និងមួយគន្លងទោចក្រយានយន្ត។ ល្បឿនសុវត្ថិភាព ៤០គីឡូម៉ែត្រ ក្នុងមួយម៉ោង សម្រាប់ផ្លូវទទឹងទំហំទទឹង៨,៥ម៉ែត្រ។ ល្បឿនសុវត្ថិភាព២៥គីឡូម៉ែត្រ ក្នុងមួយ ម៉ោង សម្រាប់ផ្លូវទទឹងទំហំ ៥,២៥ម៉ែត្រ ទៅ៥,៥ម៉ែត្រ។ ស្ពាននេះមានអាយុ កាលនៃការ ប្រើប្រាស់១០០ឆ្នាំ ដោយបំពាក់បង្គោលភ្លើងបំភ្លឺផ្លូវ រៀបចំបណ្តាញជុំវិញ បរិវេណ ស្ពានអាកាស និងអាងស្តុកទឹកក្រោមដី មានទាំងបំពាក់ម៉ូទ័របូមទឹកស្វ័យប្រវត្តិផងដែរ។

សូមបញ្ជាក់ថា ស្ពានអាកាស និងផ្លូវក្រោមដីនៅចំណុចរង្វង់មូលចោមចៅនេះ បាន បើកការដ្ឋានដំណើរការសាងសង់ជាផ្លូវការ កាលពីថ្ងៃទី២៩ ខែមិថុនា ឆ្នាំ២០១៨ ក្រោម អធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ៕ដោយ សួស សំរិត