លទ្ធផលប្រឡងឌីប្លូមឆ្នាំ២០២១នេះ នឹងប្រកាសនៅថ្ងៃទី២២ ខែវិច្ឆិកា

រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី១៧ ខែវិច្ឆិកា ឆ្នាំ២០២១ បានឲ្យដឹងថា មន្រ្ដីជាន់ខ្ពស់ក្រសួងអប់រំ បានបញ្ជាក់ថា លទ្ធផលប្រឡងឌីប្លូមឆ្នាំ២០២១នេះ នឹងប្រកាសនៅថ្ងៃទី២២ ខែវិច្ឆិកា ឆ្នាំ២០២១ បន្ទាប់ពីដំណើរការប្រឡង បានប្រព្រឹត្តិទៅដោយរលូនតាមគោលការណ៍ច្បាប់ យុត្តិធម៌ តម្លាភាព និងទទួលយកបាន អស់រយៈពេល២ថ្ងៃ។

ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍ប្រាប់វិទ្យុជាតិកម្ពុជា ឱ្យដឹងថា ជាទូទៅ ដំណើរការ ប្រឡងឌីប្លូមមានរយៈពេល ២ថ្ងៃ គឺថ្ងៃទី១៥ និងថ្ងៃទី១៦ ខែវិច្ឆិកា ឆ្នាំ២០២១ បានបញ្ចប់ដោយមានលទ្ធផលអាចទទួលយកបាន ក្នុងនោះ មានបេក្ខជនប្រឡងឌីប្លូមមួយចំនួនតូច អវត្តមានក្នុងអំឡុងពេលប្រឡងនេះ ដោយសារមូលហេតុបុគ្គល។ឯកឧត្តមបញ្ជាក់ថា ការប្រឡង ឌីប្លូម បានបន្តអនុវត្តគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព ហើយនឹង ប្រកាសលទ្ធផលប្រឡងឌីប្លូមគឺនៅថ្ងៃទី២២ ខែវិច្ឆិកា ឆ្នាំ២០២១។

ឯកឧត្តម បញ្ជាក់ថា ការប្រឡងសញ្ញាបត្រមធ្យម សិក្សាបឋមភូមិ ដែល ប្រព្រឹត្តទៅកាលពីថ្ងៃទី១៥ ខែវិច្ឆិកា ឆ្នាំ២០២១ មានបេក្ខជនចូលរួមប្រឡងចំនួន១៦២,៥៨៩នាក់ ក្នុងនោះនារីចំនួន ៨៧,៨៧១នាក់ ៕

ប្រភព៖ ក្រសួងព័ត៌មាន