សមត្ថកិច្ច ចុះធ្វើកិច្ចសន្យាដល់ម្ចាស់ទីតាំងឱ្យបញ្ឈប់លក់ផលិតផលស៊ីហ្សា និងបារីអេឡិចត្រូនិចមួយកន្លែង នៅទីតាំងផ្លូវចូលផ្សាររាត្រី ក្នុងខេត្តបន្ទាយមានជ័យ
ខេត្តបន្ទាយមានជ័យ៖ យោងតាមការចុះផ្សាយរបស់ អគ្គស្នងការដ្ឋាននគរបាលជាតិ នៅថ្ងៃទី១៥ ខែកក្កដា ឆ្នាំ២០២២ បានឲ្យដឹងថា តូបមួយកន្លែងលក់ផលិតផលស៊ីហ្សា និងបារីអេឡិចត្រូនិចផ្លូវចូលផ្សាររាត្រី ស្ថិតក្នុងភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ត្រូវបានកម្លាំងនគរបាលក្រុងសិរីសោភ័ណ សហការជាមួយនគរបាលប៉ុស្តិ៍ព្រះពន្លា ដឹកនាំដោយលោកវរសេនីយ៍ឯក ស៊ី ឌី អធិការនគរបាលក្រុងសេរីសោភ័ណចុះធ្វើការអប់រំ និងធ្វើកិច្ចសន្យាដល់ម្ចាស់ទីតាំង លក់ផលិតផលស៊ីហ្សា និងបារីអេឡិចនិចដោយបញ្ឈប់មិនឲ្យបន្តលក់ទៀត ។ ការចុះធ្វើការអប់រំ និងធ្វើកិច្ចសន្យាដល់ម្ចាស់ទីតាំង លក់ផលិតផលស៊ីហ្សា និងបារីអេឡិចត្រូនិចនេះ នៅវេលាម៉ោង១០និង១៦នាទីព្រឹក ថ្ងៃទី១៣ ខែកក្កដា ឆ្នាំ២០២២។
លោកវរសេនីយ៍ឯក ស៊ី ឌី បានឲ្យដឹងថា ដោយអនុវត្តតាមបទបញ្ជា របស់ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ក្នុងឱកាសប្រជុំបូកសរុបសភាពការណ៍ និងកិច្ចសហប្រតិបត្តិការ ប្រចាំឆមាសទី១ នៅថ្ងៃទី១១ ខែកក្កដា ឆ្នាំ២០២២ ឲ្យកម្លាំងនគរបាលគ្រប់អធិការដ្ឋាន ត្រូវលុបបំបាត់ការនាំចូល ការលក់ចែកចាយ និងការប្រើប្រាស់នូវផលិតផលស៊ីហ្សា និងបារីអេឡិចត្រូនិច។
ជាក់ស្តែងនៅថ្ងៃទី១៣ ខែកក្កដា ឆ្នាំ២០២២នេះ កម្លាំងនគរបាលក្រុងសិរីសោភ័ណ និងកម្លាំងនគរបាលសង្កាត់ប៉ុស្តិ៍ព្រះពន្លា បានធ្វើការដកហូតវត្ថុតាងរួមមាន ឧបករណ៍ និងវត្ថុ ដែលពាក់ព័ន្ធការប្រើប្រាស់ស៊ីហ្សា និងបារីអេឡិចត្រូនិច៖
១.ម៉ាស៊ីនYOOZ ចំនួន ៤៣គ្រឿង
២.ម៉ាស៊ីន Vape ចំនួន៥គ្រឿង
៣.ទឹកថ្នាំ Vape ចំនួន ៩ដប
៤.ទឹកថ្នាំ YOOZ ចំនួន ៨ប្រអប់
៥.សំឡី ចំនួន ៦ប្រអប់ ដែលម្ចាស់ទីតាំងលក់ផលិតផលស៊ីហ្សា និងបារីអេឡិចត្រូនិច មានឈ្មោះ ឡុង គឹមជា ភេទប្រុស អាយុ២៦ឆ្នាំ រស់នៅភូមិសែសិន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
លោកវរសេនីយ៍ឯក ស៊ី ឌី បានបញ្ជាក់ឲ្យដឹងបន្តទៀតថា ក្នុងនោះ លោកឧត្តមសេនីយ៍ទោ សិទ្ធិឡោះ បានចេញបំរាម ៖ ១/-ការធ្វើអាជីវកម្ម និងការនាំចូលផលិតផលស៊ីហ្សា និងបារីអេឡិចត្រូនិច ត្រូវទប់ស្កាត់ជាបន្ទាន់ ។ ២/-មិនត្រូវផ្ដល់ទីតាំងឬកន្លែងប្រើប្រាស់ ស៊ីហ្សានិងបារីអេឡិចត្រូនិច គ្រប់រូបភាពណាក៏ដោយ បើនៅតែបន្តលួចលាក់ធ្វើអាជីវកម្មបារីអេឡិចត្រូនិច ឬឧបករផ្សេងៗទៀតដែលច្បាប់ហាមឃាត់សមត្ថកិច្ច និងឃាត់ខ្លួនម្ចាស់ទីតាំងនោះ អនុវត្តទៅតាមនីតិវិធី ៕
ប្រភព៖ អគ្គស្នងការដ្ឋាននគរបាលជាតិ- General Commissariat of National Police