ជម្លោះរវាងក្រុមហ៊ុនបច្ចេកវិទ្យាធំៗពីរគឺ ក្រុមហ៊ុន Apple និងក្រុមហ៊ុន Qualcomm បានកើតមានរយៈពេលជាច្រើនឆ្នាំមកហើយ ដោយក្រុមហ៊ុន Qualcomm បានអះអាងថាក្រុមហ៊ុន Apple កំពុងតែរំលោភលើច្បាប់ប៉ាតង់ចំនួនពីររបស់ខ្លួន ក្នុងបច្ចេកវិទ្យា ដែលត្រូវបានប្រើប្រាស់នៅក្នុង iPhone 6S, iPhone 6S Plus, iPhone 7, iPhone 7 Plus, iPhone 8, iPhone 8 Plus និង iPhone X ។ ម៉ូដែលទាំងនេះបានធ្វើឱ្យក្រុមហ៊ុន Apple កាន់កាប់ចំណែកទីផ្សារជិត ២៥% នៅចុងឆ្នាំមុន តែពេលនេះម៉ូដែលទាំងនេះគឺហាមមិនឱ្យមានលក់តទៀតនៅក្នុងប្រទេសចិនឡើយ។

លោក Don Rosenberg អគ្គនាយកក្រុមហ៊ុន Qualcomm បាននិយាយថា៖ «ក្រុមហ៊ុន Apple នៅតែបន្តទទួលបានអត្ថប្រយោជន៍ពីកម្មសិទ្ធិបញ្ញារបស់ Qualcomm ខណៈពេលដែលបដិសេធមិនផ្តល់សំណងដល់ Qualcomm »។ ជម្លោះនេះបានប្រែក្លាយជាការវាយប្រហារគ្នាបន្ទាប់បន្សំ ខណៈដែលសង្គ្រាមពាណិជ្ជកម្មកំពុងនៅតែបន្តរវាងចិន និងអាមេរិក។ យ៉ាងណាមិញស្ថានភាពនេះគឺជារឿងមួយគួរឱ្យអស់សំណើចដែលលោក Donald Trump បែរជាប្រើពាក្យបណ្តឹងថា ក្រុមហ៊ុនបច្ចេកវិទ្យារបស់ចិនបានលួចកម្មសិទ្ធិបញ្ញា ដើម្បីបង្ហាញពីគោលនយោបាយសេដ្ឋកិច្ចឈ្លានពានទៅលើអាមេរិកទៅវិញ។

បើទោះបីជាលោក Donald Trump និងលោក Xi JinPing បានឈានដល់បទឈប់បាញ់រយៈពេល ៩០ថ្ងៃនៅក្នុងសង្គ្រាមពាណិជ្ជកម្ម ដែលមានតម្លៃរាប់ពាន់លានដុល្លារដែលបានផ្ទុះឡើងរវាងប្រទេសទាំងពីរចាប់តាំងពីដើមឆ្នាំមកក៏ដោយ ការចាប់ខ្លួននាយកប្រតិបត្តិក្រុមហ៊ុន Huawei លោកស្រី Meng Wanzhou បានបង្ហាញទៅកាន់ទីក្រុងប៉េកាំងថា ប្រទេសអាមេរិកគឺ មិនទាន់ត្រៀមខ្លួនរួចរាល់ដើម្បីផ្អាកការប៉ះទង្គិចនេះទេ។ ក្នុងពេលនេះផងដែរក្រុមហ៊ុនបច្ចេកវិទ្យាជាច្រើននៅក្នុងប្រទេសចិន គឺកំពុងផ្តល់ការលើកទឹកចិត្តដល់និយោជិកឱ្យប្រើផលិតផលរបស់ក្រុមហ៊ុន Huawei និងហាមប្រាមមិនឱ្យប្រើប្រាស់ផលិតផល Apple ទៀតទេ៕

អត្ថបទ៖ លីដា
ប្រភព៖ RT