ក្រុមហ៊ុន VinSmart ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនអចលនទ្រព្យ Vingroup ប្រទេសវៀតណាម បានប្រកាសជាផ្លូវការនូវស្មាតហ្វូនថ្មី ៤ប្រភេទ កាលពីថ្ងៃទី១៤ ខែធ្នូ ថ្មីៗនេះ។ ស្មាតហ្វូន Vsmart ប្រើប្រាស់ប្រព័ន្ធប្រតិបត្តិការ VOS ដែលជាការអភិវឌ្ឍប្រព័ន្ធប្រតិបត្តិការ Android និងមានតម្លៃចាប់ពី ២.៥លានដុង (១០៦ដុល្លារ) ដល់ ៦.៣ លានដុង (២៦៩ដុល្លារ) ។

លោក Tran Minh Trung អគ្គនាយកក្រុមហ៊ុន VinSmart បាននិយាយថា បច្ចុប្បន្នយើងកំពុងប្រើប្រាស់មន្ទីរពិសោធន៍នៅសហរដ្ឋអាមេរិក កូរ៉េខាងត្បូង ជប៉ុន ចិន អ៊ីស្រាអ៊ែល និងសិង្ហបុរី ដើម្បីសិក្សាពីបច្ចេកវិទ្យាថ្មីៗដែលប្រើសម្រាប់ស្មាតអេឡិចត្រូនិច (smart electronics) ។ ជាមួយនឹងអត្ថប្រយោជន៍នៃបច្ចេកវិទ្យា ធនធានមនុស្ស និងរោងចក្រ VinSmart គ្រោងនឹងបើកឱ្យដំណើរការនូវទូរស័ព្ទរបស់ខ្លួនចំនួន ១០ប្រភេទថែមទៀត នៅឆ្នាំ ២០១៩នេះ ។ នៅថ្ងៃដដែល VinSmart បានឈានដល់កិច្ចព្រមព្រៀងមួយ ស្តីពីសិទ្ធិកម្មសិទ្ធិបញ្ញាជាមួយក្រុមហ៊ុនឧបករណ៍អេឡិចត្រូនិកនាំមុខគេ និងក្រុមហ៊ុនទូរគមនាគមន៍ឈានមុខគេនៅសហរដ្ឋអាមេរិក Qualcomm Incorporated ផងដែរ។

ក្រោមកិច្ចព្រមព្រៀងនេះក្រុមហ៊ុន Qualcomm នឹងផ្តល់សិទ្ធិកម្មសិទ្ធិបញ្ញាដល់ក្រុមហ៊ុន VinSmart សម្រាប់ការផលិតការផលិត និងការលក់ឧបករណ៍បរិក្ខារ។ VinSmart នឹងចូលរួមជាផ្លូវការនូវបញ្ជីនៃអ្នកផលិតឧបករណ៍ដើម (OEMs) ទូទាំងពិភពលោក។ ក្រុមហ៊ុន VinSmart និង Qualcomm ក៏បានព្រមព្រៀងគ្នាផងដែរដើម្បីពន្លឿនកិច្ចសហប្រតិបត្តិការជាយុទ្ធសាស្ត្ររវាងភាគីទាំងពីរនៅក្នុងវិស័យទូរស័ព្ទស្មាតហ្វូនឧបករណ៍ IoT ប្រតិបត្តិការ 5G, AI និង ML ។ ជាក់ស្តែងក្រុមហ៊ុនទាំងពីរនឹងរួមគ្នាបង្កើតកម្មវិធីសម្រាប់ការស្រាវជ្រាវ អភិវឌ្ឍន៍នៃផលិតផលបង្កើតការសាកល្បងសម្រាប់ទូរស័ព្ទស្មាតហ្វូនឧបករណ៍ IoT និងផលិតផលផ្សេងទៀតដែលផលិតដោយ VinSmart ៕

អត្ថបទ៖ លីដា
ប្រភព៖ vietnamplus