រាជទាយាទអារ៉ាប៊ីសាអូឌីត ព្រះអង្គម្ចាស់ Mohammed Bin Salman នឹងមិនចូលរួមព្រះរាជពិធីបុណ្យសពរបស់ម្ចាស់ក្សត្រី Elizabeth II នោះទេ

ការិយាល័យកិច្ចការបរទេសរបស់ចក្រភពអង់គ្លេស បាននិយាយថា រាជទាយាទអារ៉ាប៊ីសាអូឌីត គឺព្រះអង្គម្ចាស់ Mohammed Bin Salman មិនត្រូវបានរំពឹងថា នឹងចូលរួមព្រះរាជពិធីបុណ្យសពរបស់ម្ចាស់ក្សត្រី Elizabeth II នោះទេ។ ប្រភព​ដែល​បាន​ដក​ស្រង់​សម្តី​ដោយ រ៉យទ័រ បាន​និយាយ​ថា ​ការ​ផ្លាស់​ប្តូរ​នេះ​ត្រូវ​បាន​ធ្វើ​ឡើង​ដោយភាគី​អារ៉ាប៊ីសាអូឌីត។ មុននេះ ក្រុម​សិទ្ធិមនុស្ស​ក៏បានធ្វើការ​រិះគន់យ៉ាងខ្លាំង លើ​ការសម្រេចចិត្ត​អញ្ជើញ​ព្រះអង្គម្ចាស់​របស់​អារ៉ាប៊ីសាអូឌីតអង្គនេះ ខណៈដែលទ្រង់ត្រូវបានលោកខាងលិចចោទប្រកាន់ថា បានបញ្ជាឱ្យមានការសម្លាប់អ្នកកាសែតអារ៉ាប៊ីសាអូឌីតលោក Jamal Khashoggi ក្នុងឆ្នាំ២០១៨។