ប៉ូលីសបានឱ្យដឹងថ្ងៃសៅរ៍ ទី២២ ខែធ្នូ នេះថា Scammer ឬជនបោកប្រាស់តាមអិនធើណេត ជាច្រើនបានបន្លំខ្លួនជាអ្នកធ្វើការនៅក្រុមហ៊ុន Google និង Apple ហើយបោកប្រាស់ជនរងគ្រោះជាច្រើននាក់ យ៉ាងហោចណាស់ ១៥,៧០០ដុល្លារសិង្ហបុរី (ប្រហែល ១១,៤២០ដុល្លារអាមេរិក) ពីថ្ងៃទី ១៣ ដល់ថ្ងៃទី ២០ខែធ្នូ។ ប៉ូលីសបានបន្តថា យ៉ាងហោចណាស់មានរបាយការណ៍ចំនួន៨ នៃការក្លែងបន្លំក្លែងបន្លំ ដោយបុគ្គលិកមកពីក្រុមហ៊ុន Apple និង Google បានទូរស័ព្ទ​ទៅជនរងគ្រោះទាំងនោះ ហើយជាពិសេសហាងទំនិញលក់រាយត្រូវបានកំណត់គោលដៅនៅក្នុងគ្រោងការក្លែងបន្លំពិសេសនេះ។

ប៉ូលីសបាននិយាយថា នៅក្នុងគ្រោងការណ៍នេះ អ្នកក្លែងបន្លំខ្លួនជាបុគ្គលិកមកពីក្រុមហ៊ុន Apple និង Google បានហៅទូរស័ព្ទ​ទៅអ្នកលក់រាយតាមហាងទំនិញទាំងនោះដោយអះអាងថា បានទទួលពាក្យបណ្តឹងជាច្រើនពីអតិថិជន ដែលទិញ Apple iTunes និង Google Play Gift Cards របស់ពួកគេ។ ដោយជាផ្នែកមួយនៃ «ការស៊ើបអង្កេត» របស់ពួកគេអ្នក ក្រុមក្លែងបន្លំនឹងស្នើសុំលេខកូដសកម្មរបស់ Gift Card ដោយផ្អែកលើលេស «សុពលភាព» របស់ពួកវា។ នៅពេលទទួលបានកូដទាំងនោះហើយ អ្នកបោកប្រាស់នឹងប្រាប់អ្នកលក់រាយថា ពួកគេនឹងទូរស័ព្ទ​ត្រលប់ទៅអ្នកលក់រាយទាំងនោះវិញក្រោយពីបានធ្វើរបាយការណ៍។ យ៉ាងណាមិនប៉ូលីសបានណែនាំដល់អ្នកលក់រាយ ឱ្យមានការប្រុងប្រយ័ត្ននៅពេលទទួលបានការហៅពីមនុស្សដែលមិនស្គាល់ ទោះបីជាពួកគេអះអាងថាកំពុងធ្វើការឱ្យក្រុមហ៊ុនផ្គត់ផ្គង់ក៏ដោយ។ ប៉ូលីសក៏បានណែនាំម្ចាស់ហាងដើម្បីអប់រំបុគ្គលិករបស់ពួកគេអំពីការបោកប្រាស់នេះ៕

អត្ថបទ៖ លីដា
ប្រភព៖ channelnewsasia