សម្តេចតេជោ ហ៊ុន សែន ស្នើឱ្យបងប្អូននៅឃុំព្រះដាក់ រក្សាភាពស្ងប់ស្ងាត់ ព្រោះមិនមានការរើឃុំទាំងមូលដូចការភ្ញាក់ផ្អើលនោះឡើយ

(ភ្នំពេញ)៖ ក្នុងឱកាសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញជាអធិបតីបើកសន្និសីទ «ចក្ខុវិស័យកម្ពុជាឆ្នាំ២០២២» ក្រោមមូលបទ «ការស្តារកម្ពុជាឡើងវិញ៖ ការអភិវឌ្ឍប្រកបដោយនិរន្តរភាព បន្ទាប់ពីវិបត្តិជំងឺកូវីដ១៩» នៅសណ្ឋាគារសុខា រាជធានីភ្នំពេញ។

សម្តេចតេជោ បានស្នើឱ្យបងប្អូននៅឃុំព្រះដាក់ រក្សាភាពស្ងប់ស្ងាត់ ក្រោយពីថ្មីៗនេះបងប្អូនប្រជាពលរដ្ឋនៅទីនោះបានធ្វើការតវ៉ាប្រឆាំងនឹងការរុះរើទៅនៅតំបន់រុនតាឯក។ សម្តេចបានបញ្ជាក់ថា «សូមបងប្អូនមានការស្ងប់ចិត្ត យើងមិនអាចធ្វើទទឹងទិស ហើយទៅរើរុះប្រជាជនដែលរស់នៅឡើយ»។

សម្តេចបន្តថា រដ្ឋកំពុងគិតគូពីហេដ្ឋារចនាសម្ព័ន្ធរបស់អង្គរ ជាពិសេសបញ្ហាទឹកនៅបារាយណ៍ខាងកើត ដើម្បីការពារសម្រាប់ប្រជាជននៅទីនោះ ម្ខាងទៀតដើម្បីដោះស្រាយការពារអង្គរ គឺអ្នករស់នៅក្រោយឆ្នាំ១៩៧៩ ដែលរស់នៅព័ទ្ធជុំប្រាសាទ តាំងទីលំនៅខុសច្បាប់ មិនស្របលក្ខខណ្ឌ របស់យូនេស្កូ នៃបេតិកភណ្ឌ។

សម្តេចតេជោ ហ៊ុន សែន នឹងបញ្ជូនឯកឧត្តម ជា សុផារ៉ា និងលោកជំទាវ ភឿង សុក្កណា ទៅនិយាយជាមួយបងប្អូនដើម្បីពន្យល់ពីស្ថានការណ៍ផងដែរ៕

អត្ថបទ៖ ណារ៉ែន