សហរដ្ឋអាមេរិក៖ តាមរយៈវីដេអូឃ្លីបរបស់បុគ្គលិកនៅមជ្ឈមណ្ឌលថែទាំកុមារ Lil’ Blessings ក្នុងរដ្ឋ Mississippi ពាក់ម៉ាស់ Halloween ដើម្បីបំភ័យកុមារ បានក្លាយជាវីដេអូឃ្លីបដែលត្រូវបានរិះគន់យ៉ាងទូលំទូលាយថាមិនសមរម្យ។ នៅក្នុងវីដេអូឃ្លីបនេះ គេឃើញមន្ត្រីសរុប ៤ នាក់ ពាក់របាំងមុខគួរឱ្យខ្លាច បន្លាចកុមារ នៅក្នុងថ្នាក់រៀននីមួយៗអោយខ្លាច ថែមទាំងបានលើកហេតុផល​បញ្ជាក់​ថា​គឺ​ដោយសារ​តែ​ក្មេងៗទាំងនោះមិនព្រមសម្អាត ក៏ដូចជាប្រព្រឹត្តខ្លួនមិនល្អ។ ដោយឃ្លីបវិដេអូនោះដែរ គេអាចលឺសំលេងរបស់កុមារ ក៏ដូចជា សំរែ​ក​នៃ​ការភ័យខ្លាច ក្មេងខ្លះ​ភ្ញាក់​ផ្អើល ហើយ​រត់​ចេញឆ្ងាយ ខណៈមន្ត្រីផ្សេងទៀត បានចង្អុលបង្ហាញអោយដឹងថា កុមារណាប្រព្រឹត្តល្អ និងកុមារណាប្រព្រឹត្តមិនល្អ មុន​ពេល​មន្ត្រី​នោះពាក់​ម៉ាស់​ដ៏​គួរ​ឲ្យ​ភ័យ​ខ្លាច​ទៅបន្លាច​កុមារដែល​នៅ​ជិត​។ ក្រោយ​ពីឃ្លីប​នេះ​ត្រូវ​បាន​គេ​ផ្សព្វផ្សាយ​យ៉ាង​ទូលំទូលាយ បណ្តាលឱ្យភ្នាក់ងារនិយតកម្ម ពន្លឿនការស៊ើបអង្កេតលើហេតុការណ៍បែបនេះ ដើម្បីស៊ើបអង្កេតការពិត ក៏ដូចជាស្វែងរកមធ្យោបាយដោះស្រាយចំពោះកុមារដែលរងផលប៉ះពាល់ផ្លូវចិត្ត។