នៅថ្ងៃទី ១៣ ខែតុលា ឆ្នាំ២០២២ យោងតាមសារព័ត៌មាន The Sun បានរាយការណ៍ថា អ្នកដំណើរ និងអ្នកបើកយន្តហោះនៅលើយន្តហោះដឹកអ្នកដំណើរ Jet2 បានជួបនឹងហេតុការណ៍ដ៏គួរអោយរន្ធត់មួយ នោះគឺត្រូវបានគម្រាមដាក់គ្រាប់បែកលើយន្តហោះ។ បន្ទាប់ពីយន្តហោះបានធ្វើដំណើរពីទីក្រុង Dalaman ក្នុងប្រទេសទួរគីទៅកាន់ទីក្រុង Manchester នៃប្រទេសអង់គ្លេស ជាហេតុនាំអោយ កងទ័ពអាកាសរបស់អង់គ្លេសត្រូវបញ្ជូនយន្តហោះចម្បាំងដែលមានឈ្មោះថា ‘Typhoon’ ចំនួនពីរគ្រឿង ដើម្បីអមដំណើរយន្តហោះដឹកអ្នកដំណើរ Jet2 ព្រមទាំងបានអោយយន្តហោះផ្លាស់ប្តូរទិសដៅទៅចុះចតនៅអាកាសយានដ្ឋាន London Stansted នៅក្នុងស្រុក Essex ជំនួសវិញ។ ជាសំណាងល្អ យន្តហោះដឹកអ្នកដំណើរ Jet2 ដែលជាក្រុមហ៊ុនអាកាសចរណ៍តម្លៃទាបរបស់អង់គ្លេស ​អាច​ចុះ​ចត​បាន​ដោយ​មិន​មាន​ឧប្បត្តិហេតុ​ធំដុំ បន្ទាប់មក​អ្នកបើក​យន្តហោះ​បាន​ចុះ​ចត​យន្តហោះ​នៅ​តំបន់​ដាច់ស្រយាល​ពី​ចំណត​សំខាន់​របស់​អាកាសយានដ្ឋាន Stansted Airport បន្ទាប់​ពី​មន្ត្រី​ត្រូវ​បាន​ប្រកាសអោយដឹង​ពី​ការ​គំរាមកំហែង​ដែលអាចកើតមានឡើង។