សម្តេចតេជោ ហ៊ុន សែន ជំរុញឱ្យរដ្ឋមន្រ្តីកសិកម្មបញ្ជូនអ្នកបច្ចេកទេសចុះជួយប្រជាពលរដ្ឋ ក្នុងការប្រើប្រាស់ពូជស្រូវ បន្ទាប់ពីទឹកជំនន់ និងទឹកស្រកចុះ

​ខេត្ត​បន្ទាយ​មានជ័យ៖ យោងតាមការចុះផ្សាយរបស់ ក្រសួងព័ត៌មាន នៅថ្ងៃទី២៤ ខែតុលា ឆ្នាំ២០២២ បានឱ្យដឹងថា ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានមានប្រសាសន៍ ជំរុញឱ្យរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បញ្ជូនអ្នកបច្ចេកទេសចុះ​ជួយ​ប្រជា​ពលរដ្ឋ ដើម្បីពន្យល់ពួកគាត់អំពីការប្រើប្រាស់ពូជស្រូវ ក្នុងការសាបព្រួស និងដាំដុះ​ឡើងវិញ នៅតាមបណ្ដាខេត្តដែលរងគ្រោះដោយជំនន់ទឹកភ្លៀងនោះ។

​ក្នុងពិធីជួបសំណេះសំណាលសួរសុខទុក្ខបងប្អូនប្រជាពលរដ្ឋ និងផ្តល់ពូជស្រូវ​ជាង​៥០០ តោន ជូនប្រជាកសិករប្រមាណ ៥ ២២០ គ្រួសារ ក្នុងស្រុកចំនួនបីក្នុង​ខេត្ត​បន្ទាយ​មានជ័យ រួមមានស្រុកមង្គលបូរី ក្រុងសិរីសោភ័ណ និងស្រុកភ្នំស្រុក ដែលរងគ្រោះដោយទឹក​ជំនន់ទឹកភ្លៀងខូចខាតដំណាំស្រូវ នាព្រឹកថ្ងៃទី២៣ ខែតុលា ឆ្នាំ២០២២ សម្ដេចតេជោ ហ៊ុន សែន មានប្រសាសន៍ថា រាជរដ្ឋាភិបាលបានបញ្ចេញស្រូវពូជប្រមាណ ៧ ០០០ តោន ​រួច​ហើយ ដើម្បីចែកជូនប្រជាពលរដ្ឋ ។ ក៏ប៉ុន្តែការសាបព្រួសរបស់ប្រជាពលរដ្ឋ ប្រហែលជា​ខុស​បច្ចេកទេស អាចថាសាបព្រួសក្រាស់ពេក អាចធ្វើឱ្យស្រូវដុះមិនបានល្អ។ សម្តេចតេជោ បាន​ស្នើឱ្យក្រសួងកសិកម្មរុក្ខាប្រមាញ់ និងនេសាទ មានការចាំបាច់ ដើម្បីធ្វើការកែសម្រួលណែនាំ​ខាងបច្ចេកទេស សម្រាប់ការដាំដុះពាក់ព័ន្ធជាមួយនឹងការព្រួសស្រូវ ហើយសម្តេចសង្ឃឹមថា​រដ្ឋមន្ត្រី​ក្រសួងកសិកម្មថ្មី នឹងប្រើប្រាស់ឱកាសនេះ ដើម្បីស្រាវជ្រាវ ក្នុងការ​ជួយដល់ប្រជា​ពល​រដ្ឋរបស់យើងធ្វើយ៉ាងម៉េចធ្វើឱ្យការផលិតទទួលបានទិន្នផលខ្ពស់ ហើយមិនប្រើប្រាស់​ពូជ​ច្រើន។

សម្តេចតេជោនាយករដ្ឋមន្ត្រីក៏បានកោតសរសើរ និងវាយតម្លៃខ្ពស់ចំពោះកិច្ចប្រឹងប្រែង​របស់​អាជ្ញាធរពាក់ព័ន្ធទាំងអស់នៃខេត្តបន្ទាយមានជ័យ ដែលបានខិតខំជួយប្រជាពលរដ្ឋ​​ពេលជួបនូវគ្រោះទឹកជំនន់។

គួរបញ្ជាក់ដែរថា បើតាមរបាយការណ៍ របស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ទឹកជំនន់ឆ្នាំនេះបានធ្វើឱ្យប៉ះពាល់ផ្ទៃដីដំណាំស្រូវរបស់​ប្រជាពលរដ្ឋទូទាំង​ប្រទេស ចំនួន២២ ម៉ឺនហិកតា លើ២២រាជធានី ខេត្ត ក្នុងនោះផ្ទៃដីដំណាំ ស្រូវចំនួន១១​ម៉ឺន​ហិកតា រងនូវការខូចខាតទាំងស្រុង គ្រាដែលផ្ទៃដីដែលអាចស្តារឡើងវិញមានចំនួន៧ម៉ឺន ហិកតា។ ខេត្តដែលរងគ្រោះធ្ងន់ធ្ងរជាងគេដោយសារទឹកជំនន់រួមមាន ខេត្តក្រចេះ កំពង់ធំ កំពង់ចាម សៀមរាប បន្ទាយមានជ័យ បាត់ដំបង ពោធិ៍សាត់ និងខេត្តកំពង់ឆ្នាំង។ ដំណាំ​ស្រូវ​ដែលរងនូវការខូចខាត ត្រូវការស្រូវពូជប្រមាណ ៧ពាន់តោន សម្រាប់ការងារស្ដារឡើងវិញ​ជូនប្រ​ជាពលរដ្ឋ។ រហួតមកដល់ពេលនេះ ស្រូវពូជប្រមាណ ៦ពាន់តោន ហើយត្រូវបានដឹក​ជញ្ជូនទៅដល់គោលដៅ និងត្រៀមចែកជូនប្រជាពលរដ្ឋ។ ជាមួយគ្នានេះ ក្រសួងកសិកម្មក៏​បាន​រៀប​​ចំពូជបន្លែ ចំនួន១៨ម៉ឺន ឃីត និងចែកជូនប្រជាពលរដ្ឋបាន៨ម៉ឺនឃីតរួចរាល់ហើយ គិតត្រឹមថ្ងៃទី២២ ខែតុលាឆ្នាំ២០២២នេះ៕

ប្រភព៖ ក្រសួងព័ត៌មាន