ឆ្លងចរន្តអគ្គិសនី បង្កជាអគ្គិភ័យយ៉ាងសន្ធោសន្ធៅ ឆាបឆេះផ្ទះប្រជាពលរដ្ឋចំនួន ២គ្រួសារ ខូចខាតទាំងស្រុង ស្ថិតនៅស្រុកបរិបូណ៍ ខេត្តកំពង់ឆ្នាំង

ខេត្តកំពង់ឆ្នាំ៖ យោងតាមការចុះផ្សាយពី ការិ.ផ្សព្វផ្សាយអប់រំ នៃស្នងការដ្ឋាននគរបាលខេត្តកំពង់ឆ្នាំង បានឱ្យដឹងថា នៅវេលាម៉ោង ១០និង២៩ នាទីព្រឹក ថ្ងៃទី១៤ ខែវិច្ឆិកា ឆ្នាំ២០២២ មានករណីអគ្គិភ័យឆាបឆេះផ្ទះបងប្អូនប្រជាពលរដ្ឋចំនួនពីរគ្រួសារ ដែលស្ថិតនៅភូមិឆ្នុកទ្រូ ឃុំឆ្នុកទ្រូ ស្រុកបរិបូណ៍ ខេត្តកំពង់ឆ្នាំង។ ករណីគ្រោះអគ្គិភ័យខាងលើនេះ បណ្តាលមកពីឆ្លងចរន្តអគ្គិសនីបង្កជាអណ្តាតភ្លើងឆាបឆេះឡើងតែម្ដង។

ផ្ទះដែលរងការឆាបឆេះខាងលើនេះជាផ្ទះរបស់៖១.ឈ្មោះ ឡេ យ៉ាំងសា ភេទប្រុស អាយុ៦៣ឆ្នាំ ជនជាតិវៀតណាម ផ្ទះមានទំហំ ១២ × ៤,៧០ម៉ែត្រ ជញ្ជាំងស័ង្កសី ដំបូលប្រក់ស័ង្កសី រនាបក្ដារ ឆេះអស់ទាំងស្រុង។ ២.ឈ្មោះ សុខា ប៊ុណ្ណារិទ្ធិ ភេទប្រុស អាយុ៥៤ឆ្នាំ ជនជាតិខ្មែរ មានផ្ទះចំនួន០២ខ្នង ផ្ទះទី១ មានទំហំ ១៨×១១ ម៉ែត្រ រនាបក្ដារ ជញ្ជាំងក្ដារ ដំបូលប្រក់ស័ង្កសី ជាផ្ទះរស់នៅ និងដាក់សម្ភារលក់ដូរ ផ្ទះទី២ មានទំហំ ១១×៩,៥០ ម៉ែត្រ រនាបក្ដារ ជញ្ជាំងក្ដារ ដំបូលប្រក់ស័ង្កសី ជាផ្ទះដាក់ឥវ៉ាន់លក់ ត្រូវឆេះអស់ទាំងស្រុង។

ក្នុងកិច្ចប្រតិបត្តិការសង្គ្រោះ រថយន្តពន្លត់អគ្គិភ័យរបស់អធិការរដ្ឋាននគរបាលស្រុកបរិបូណ៌ មិនអាចជួយសង្គ្រោះបានមកពីផ្ទះប្រជាពលរដ្ឋនៅលើទឹក ហើយក្នុងករណីអគ្គិសនីភ័យនេះមិនមាន គ្រោះថ្នាក់ដល់ជីវិតមនុស្សឡើយ៕