កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង នឹងក្លាយជាច្រកដឹកជញ្ជូនទំនិញតាមផ្លូវទឹកចំកណ្តាលប្រទេសកម្ពុជា

ខេត្តកំពង់ឆ្នាំ៖ នៅថ្ងៃទី០៩ ខែមីនា ឆ្នាំ២០២៣ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំងតម្លៃចន្លោះ ៣០០ ទៅ៥០០លានដុល្លារ នឹងក្លាយជាច្រកដឹកជញ្ជូនទំនិញតាម ផ្លូវទឹកចំកណ្តាលប្រទេសកម្ពុជា បន្ទាប់សាងសង់រួចនៅពេលដ៏ខ្លីខាងមុខនេះ ដែលមិនត្រឹមតែជួយ លើកស្ទួយសេដ្ឋកិច្ចជាតិ ប៉ុន្តែក៏ផ្តល់ការងារប្រមាណ ១០០០កន្លែងទៅ ១៥០០កន្លែង ដល់ប្រជាពលរដ្ឋ និងលើកស្ទួយសេដ្ឋកិច្ចប្រជាពលរដ្ឋក្នុងតំបន់ និងតំបន់ផ្សេងទៀត។

ឯកឧត្តម ទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ក្នុងឱកាសដឹកនាំប្រតិភូចុះពិនិត្យវឌ្ឍនភាពគម្រោងអភិវឌ្ឍន៍កំពង់ផែពហុបំណង និងមណ្ឌលភ័ស្តុភារកម្មដែលស្រុកក្នុងឃុំកំពង់ហៅ ស្រុកកំពង់លែង កំពង់ឆ្នាំង នៅថ្ងៃទី៩ ខែមីនានេះ ឯកឧត្តម ទេសរដ្ឋមន្រ្តី បានបញ្ជាក់ថា ការរៀបចំឱ្យមានជាកំពង់ផែ និងមណ្ឌលភ័ស្តុភារកម្មនេះ គឺក្នុងគោលបំណងជំរុញការដឹកជញ្ជូនតាមផ្លូវគោក និងផ្លូវទឹកក្នុងប្រទេស ព្រមទាំងដឹកជញ្ជូន និងនាំចេញកសិផលពីខេត្តកំពង់ឆ្នាំង ខេត្ត ពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ទៅក្រៅប្រទេស។ ម្យ៉ាងវិញទៀតការសាងសង់កំពង់ផែ និងមជ្ឈមណ្ឌលភ័ស្តុភារកម្មនេះ ក៏បានផ្ដល់ការងារដល់ប្រជាពលរដ្ឋដែលរស់នៅក្នុងខេត្តកំពង់ឆ្នាំងបានមួយចំនួន។

សូមបញ្ជាក់ថា គម្រោងអភិវឌ្ឍន៍កំពង់ផែពហុបំណង និងមណ្ឌលភ័ស្តុភារកម្មនេះ ស្ថិតក្រោមការវិនិយោគរបស់ក្រុមហ៊ុន KLP.T TRANSPORTATION របស់អ្នកឧកញ៉ា ទ្រី ភាព ក្នុងគម្រោងទុនចន្លោះ៣០០ ទៅ៥០០លានដុល្លារ ដើម្បីជំរុញការនាំចេញកសិផលតាមផ្លូវទឹក បង្កើនការងារ និងជំរុញកំណើនសេដ្ឋកិច្ចជាតិ។

គម្រោងអភិវឌ្ឍន៍កំពង់ផែពហុបំណង និងមណ្ឌលភ័ស្តុភារកម្មនេះ ភ្ជាប់នឹងគម្រោង ផ្លូវ50C ដែលរដ្ឋគ្រោងធ្វើឆ្លងកាត់ទន្លេសាបពីខេត្តកំពង់ឆ្នាំងទៅខេត្តកំពង់ធំ។

ផែនេះបាននិងកំពុងសាងសង់លើផ្ទៃដី ជាង១០០ហិកតា រួមមាន៖

១. កំពង់ផែដឹកជញ្ជូនទំនិញ ដែលនឹងប្រមូលផលកសិកម្ម កសិឧស្សាហកម្មចំរុះ ពីតំបន់ផ្សេងៗ ដើម្បីធ្វើការចែកចាយបន្តទៅកាន់ទីផ្សារជាតិ។

២. បង្កើតមណ្ឌលសន្និធិប្រេង ដោយ មានការសាងសង់ជាពោងស្តុកប្រេងសម្រាប់ធ្វើការចែកចាយប្រេងទូទាំងប្រទេស។

៣. បង្កើតរមណីយដ្ឋានទេសចរណ៍ ជាតំបន់ទេសចរណ៍ធម្មជាតិ លំនៅដ្ឋានបែបទំនើប និងជាកន្លែងលំហែរកាយសម្រាប់ភ្ញៀវជាតិ និងអន្តរជាតិ។

និង៤. ជាតំបន់សេដ្ឋកិច្ចពិសេស រួមមាន៖ តំបន់ឧស្សាហកម្ម មានរោងចក្រសហគ្រាសតូច-ធំ ការទីផ្សារដោះដូរទំនិញ ផលិតផលកសិកម្មចំរុះ ឃ្លាំងសម្រាប់ជួលដើម្បីស្តុកទំនិញក្នុងការនាំចេញ-ចូល និងជាកន្លែងចែកចាយទំនិញជាលក្ខណៈជាតិ និងអន្តរជាតិ៕

ប្រភព៖ ក្រសួងព័ត៌មាន