លេងមែនទែនហើយ! Samsung នឹងញាត់ Ram ដល់ 12GB និងមេម៉ូរីដល់ទៅ 1TB ចូលក្នុង Galaxy S10 ជំនាន់ថ្មីរបស់ខ្លួន

កាលពីពេលថ្មីៗនេះ មានព័ត៌មានបែកធ្លាយមួយចេញពីអ្នកតំណាងក្រុមហ៊ុន Samsung ម្នាក់ ដែលមានផលិតផលគំរូ Galaxy S10 នៅក្នុងដៃបានធ្វើការបញ្ជាក់យ៉ាងច្បាស់ថា S10 នឹងមានចំនួន០៣ទំហំ ហើយបានបញ្ជាក់ទៀតថាម៉ូដែល 5,8 នឹងមិនត្រូវបានគេហៅថា ” Lite ” នោះទេ។

ផ្ទុយទៅវិញវានឹងគ្រាន់តែជា S10 ដែលតូចជាងគេហើយនឹងមាន បន្ទះឈីប និងអង្គចងចាំដូចគ្នា ប៉ុន្តែសម្រាប់ Galaxy S10+ គឺមានទំហំ RAM 12GB និងអង្គផ្ទុកទិន្នន័យរហូតដល់ទៅ 1TB ឯណោះ។

S10+ នឹងមានអេក្រង់ 6.4 អ៊ីញ មានកាមេរ៉ាខាងក្រោយចំនួន 3 និងកាមេរ៉ា Selfie មានចំនួន 2 គ្រាប់ ហើយសម្រាប់ម៉ូដែល០២ផ្សេងទៀតគឺមានកាមេរ៉ាខាងមុខតែមួយប៉ុណ្ណោះ។ Galaxy S10 នឹងមានអេក្រង់ 6.1 អ៊ីញ មានកាមេរ៉ាខាងក្រោយ 3 គ្រាប់ដូច Galaxy S10+ ដែរ ដោយឡែក Galaxy S10 ដែលតូចជាងគេនឹងមានទំហំអេក្រង់ 5.8 អ៊ីញ និងមានកាមេរ៉ាតែ០២គ្រាប់ប៉ុណ្ណោះនៅផ្នែកខាងក្រោយ ។ ហើយសម្រាប់ជម្រើសពណ៌នឹងមានពណ៌ខ្មៅ ពណ៌ស (ដូចជា Pearl) និងពណ៌ទឹកសមុទ្របៃតង ហើយម៉ូដែលមួយចំនួនទៀតនឹងមានជម្រើសពណ៌បន្ថែម ដែលអាចមានពណ៌ ខៀវ និង លឿង ។

ទូរស័ព្ទ Samsung Galaxy S10 ទាំង០៣នេះនឹងបង្ហាញខ្លួនជាមួយប្រព័ន្ធប្រត្តិបត្តិការណ៍ One UI ថ្មីហើយនឹងមានរន្ធដោតកាសស្តាប់ត្រចៀកទំហំ 3.5 មីលីម៉ែត្រទៀតផង ។ ពួកគេនឹងត្រូវដាក់លក់នៅថ្ងៃទី 8 ខែមីនា បន្ទាប់ពីការប្រកាសរបស់ពួកគេនៅថ្ងៃទី 20 ខែកុម្ភៈ៕

អត្ថបទ៖ ឧស្សាហ៍
ប្រភព៖ gsmarena