រាជធានីភ្នំពេញ៖ ដើមឈើសាធារណៈចំនួន ៤ដើម ត្រូវបានបេតុងចាក់ហ៊ុមព័ទ្ធ នៅទីតាំងទល់មុខក្រសួងសុខាភិបាល នៅផ្លូវ២៨៩ ក្នុងសង្កាត់បឹងកក់២ ពេលនេះត្រូវបានអភិបាល នៃគណៈអភិបាលខណ្ឌទួលគោក ចុះណែនាំ ឱ្យម្ចាស់ទីតាំងនោះ រុះរើបេតុងចេញ និងរៀបចំឲ្យមានសោភ័ណភាពល្អដូចដើម។

បើយោងតាមការចុះផ្សាយរបស់ រដ្ឋបាលខណ្ឌទួលគោក បានឱ្យដឹងថា​ នៅវេលាម៉ោង១១៖៥៨នាទី ថ្ងៃទី២០ ខែមីនា ឆ្នាំ២០២៣ ដោយបានការដឹកនាំរបស់ ឯកឧត្តម ជា ពិសី អភិបាល នៃគណៈអភិបាលខណ្ឌ ចាន់បណ្ឌិត លោកអភិបាលរងខណ្ឌ ចុះណែនាំ ហាងបេប៊ីអោតឡេត បំពានលើចិញ្ចើមផ្លូវ ចាក់បេតុងហ៊ុមព័ទ្ធដើមឈើសាធារណៈចំនួន ៤ដើម នៅផ្លូវ២៨៩ ក្នុងសង្កាត់ បឹងកក់២ និងបានឲ្យរុះរើបេតុងនោះចេញវិញ និងរៀបចំឲ្យមានសោភ័ណភាពល្អដូចដើម ព្រមទាំងធ្វើកំណត់ហេតុណែនាំ មិនអនុញ្ញាតឲ្យមានការធ្វើបែបនេះម្តងទៀតឡើយ ក្នុងករណីម្ចាស់ហាងមិនសហការណ៍និងធ្វើឲ្យប៉ះពាល់ ឬងាប់ដើមឈើខាងលើនេះ និងត្រូវទទួលខុសត្រូវចំពោះមុខច្បាប់៕

ប្រភព៖ រដ្ឋបាលខណ្ឌទួលគោក