អបអរសាទរ! កម្ពុជាបានបំបែកឯតទគ្គកម្ម «បេះដូងច្រើនជាងគេនៅលើពិភពលោក» ចំនួន៣,៩១៧,៨០៥ បេះដូង

ខេត្តសៀមរាប៖ នៅថ្ងៃទី១១ ខែមេសា ឆ្នាំ២០២៣ គណៈកម្មការកំណត់ត្រាពិភពលោក(Guinness world record) បានប្រកាសថា កម្ពុជាជាប្រទេសដែលមានអ្នកចូលរួមបត់បេះដូង បានចំនួនបេះដូងច្រើនជាងគេនៅលើពិភពលោក។ កម្ពុជាបំបែកកំណត់ត្រាពិភពលោកថ្មី តាមរយៈការបត់បេះដូងដែលមានចំនួនរហូតដល់ ៣,៩១៧,៨០៥បេះដូង។ តួលេខនេះគឺបំបែកកំណត់ត្រាចាស់របស់អង់គ្លេសដែលកាលពីឆ្នាំ២០១៩ មានចំនួន ៥៣,៧០៤ បេះដូង។

បន្ទាប់ពីការចូលរួមបត់បេះដូងពីពុកម៉ែ បងប្អូនប្រជាពលរដ្ឋ សិស្សានុសិស្ស និងយុវជនគ្រប់ទិសទី រួចមក បេះដូងក្រដាស ត្រូវបានរៀបចំជា «សួនបេះដូង» នៅបរិវេណប្រាសាទអង្គរវត្ត។ បេះដូងក្រដាសដែលបានបត់ឡើងដោយដៃប្រជាពលរដ្ឋកម្ពុជានាពេលនេះ មិនត្រឹមតែដើម្បីបំបែកឯតទគ្គកម្មប៉ុណ្ណោះទេ ប៉ុន្តែវាជាទឹកចិត្តនៃក្តីស្រឡាញ់របស់ពលរដ្ឋកម្ពុជា អបអរសាទរកម្ពុជាដែលបានធ្វើជាម្ចាស់ផ្ទះនៃការប្រកួតកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ៕