ឥណ្ឌា៖ ដូចអ្នកទាំងអស់គ្នាបានដឹងរួចមកហើយថា PUBG គឺជាហ្គេមដែលពេញនិយម និងធ្វើឱ្យញៀនខ្លាំងបំផុត ដោយអ្នកខ្លះលេងវាសូម្បីតែពេលកំពុងបរិភោគអាហារ ឬធ្វើការ និយាយរួមគឺ ទំនេរមិនបាន។ ប៉ុន្មានរយៈមុនក៏មានករណីមួយថា បុរសម្នាក់បានចុះចោលប្រពន្ធដែលកំពុងពពោះទៅតាមហ្គេម PUBG នេះផងដែរ។ ជាក់ស្តែងក្នុងករណីនេះវិញ បុរសម្នាក់មកពីទីក្រុង Chhindwara របស់ឥណ្ឌា គាត់រវល់តែលេង PUBG ពេកក៏បានចាប់ដបទឹកអាស៊ីដមកផឹកដោយច្រឡំថា វាជាដបទឹក និងបណ្តាលឱ្យគាត់ស្ទើរតែបាត់បង់ជីវិត។

លោកវេជ្ជបណ្ឌិត Manan Gogiya ដែលជាអ្នកធ្វើការវះកាត់សង្គ្រោះបុរសរងគ្រោះបានមានប្រសាសន៍ថា ហេតុការណ៍នេះកើតឡើងនៅពេលដែលគាត់រវល់នឹងហ្គេម PUBG និងមិនបានចាប់អារម្មណ៍ថា គាត់អង្គុយជិតដបទឹកអាស៊ីដនោះទេ ទើបបណ្តាលឱ្យគាត់ចាប់កាន់វាមកផឹកបែបនេះ។ លោកវេជ្ជបណ្ឌិតក៏បានបន្តថា សូម្បីតែកំឡុងពេលព្យាបាលក៏គាត់នៅតែលេងតែហ្គេម PUBG និងមើលវីដេអូពីទូរស័ព្ទរបស់គាត់ដែរ។ ដូច្នេះអ្នកទាំងអស់គ្នាគួរតែរៀនអំពីករណីនេះ កុំញៀនលេងវាខ្លាំងពេក និងគួរចេះប្រយ័ត្ននៅពេលចាប់កាន់ ឬធ្វើអ្វីមួយ៕

អត្ថបទ៖ លីដា
ប្រភព៖ worldofbuzz