ព័ត៌មានបែកធ្លាយកន្លងមកពីស្មាតហ្វូន Huawei P30 និង P30 Pro ដែលបាននិយាយផ្ដោតខ្លាំងទៅលើកាមេរ៉ា ហើយពេលនេះក៏មានរូបភាពមួយចំនួន ដែលជាលក្ខណៈរូបភាពផ្សព្វផ្សាយពីស្មាតហ្វូនម៉ូឌែល P30 និង P30 Pro ដែលបង្ហោះនៅលើបណ្ដាញសង្គមរបស់ចិន និងមានអក្សរនៅលើរូបភាពថា Huawei P30 Series #RewriteTheRules។ ឥឡូវនេះក្រុមហ៊ុន Huawei ជាពិសេស CEO Yu Chengdong ក៏បានទទួលយកនូវរូបភាពផ្សព្វផ្សាយនេះផងដែរ ហើយស្មាតហ្វូននេះនឹងបង្ហាញខ្លួននៅថ្ងៃទី ២៦ ខែមីនា ខាងមុខនេះ នៅទីក្រុងប៉ារីស ប្រទេសបារាំង ។

តែយ៉ាងណាព័ត៌មានលម្អិតរបស់ Huawei P30 និង P30 Pro យើងមិនទាន់ដឹងច្បាស់ថា ស្មាតហ្វូនកំពូលរបស់ក្រុមហ៊ុនចិនមួយនេះ នឹងបំពាក់អ្វីមកជាមួយ និងមានរូបរាងបែបយ៉ាងម៉េចទេ ដោយយើងគ្រាន់តែដឹងថា កាមេរ៉ារបស់ស្មាតហ្វូន P30 series នេះនឹងមានបួនគ្រាប់ ហើយអាចថតពង្រីករូបភាពចូលបានរហូតដល់ ១០ដង ដែលវាពុំទាន់មានស្មាតហ្វូនណាប្រើប្រាស់កែវលេនបែបនេះនៅលើស្មាតហ្វូននៅឡើយទេ ។ រូបភាពគំរូបានបង្ហាញថា Huawei P30 នឹងមានអេក្រង់ 6.1 អ៊ីញ ចំណែកឯ P30 Pro នឹងមានអេក្រង់ 6.5 អ៊ីញ ។ ហើយក៏មានការំពឹងទុកថា ម៉ូឌែលទាំងពីរនេះ នឹងប្រើប្រាស់បន្ទះឈីប Kirin 980 និងប្រើប្រាស់ជាមួយបច្ចេកវិទ្យា 5G ផងដែរ ។ វាអាចនឹងមានដុំសាកថ្មលឿន 40W ទៀតផង ៕

ពាក្យចចាមអារាមថា P30 និង P30 Pro នឹងមានរូបរាងបែបនេះ

អត្ថបទ៖ ឧស្សាហ៍
ប្រភព៖ gsmarena