លោក គង់ ចំរើន តារាចម្រៀង បែបក្រមិចក្រមើម សម្ដីចាក់ទឹកមិនលិច បានលេចមុខសារជាថ្មីម្ដងទៀត ក្នុងកម្មវិធី Killer Karaoke Cambodia រដូវកាលទី៧ មកបង្កបរិយាកាសយ៉ាងសប្បាយរីករាយ ធ្វើឱ្យទស្សនិកជន សើចចុកពោះ។ ម្ចាស់បទ «ក្រមុំដេកយំមេម៉ាយដើរសើច» មកលើកនេះកាន់តែធ្ងន់ធ្ងរជាមួយវិញ្ញាសា «កៅអីឆ្លងភព» ធ្វើឱ្យរូបគេស្រែកច្រៀងលែងចេញ ហើយគិតតែពីស្រែករកម៉ែឱ្យជួយ។

 
ដៃគូចម្រៀងដ៏ស័ក្ដិសមរបស់កញ្ញា ឈីន រតនៈ បានប្រាប់ថា មូលហេតុដែលខ្លួនសម្រេចចិត្តមកចូលរួមប្រកួតលើកនេះ ព្រោះចង់ដឹងថារដូវកាលទី ៧ នៃកម្មវិធីកម្សាន្តដ៏ល្បីលំដាប់ពិភពលោកនេះ មានអ្វីដែលកាន់តែព្រឺព្រួច ហើយថែមទាំងអះអាងថាមិនរាងចាលនឹងវិញ្ញាសាក្នុងកម្មវិធីនោះទេ។ មុនពេលចាប់ផ្ដើមប្រកួត គង់ ចំរើន សម្ដីចាក់ទឹកមិនលិច មិនព្រឺ មិនខ្លាចទេ តែមានឯណាគ្រាន់តែឡើងទៅលើកៅអីឆ្លងភពភ្លាមទឹកមុខចាប់ផ្ដើមប្រែប្រួលទៅហើយ។

 
ទស្សនិកជនហួសចិត្តមិននឹកស្មានថា បុរសមានសាច់ទ្រលុកទ្រលន់ គង់ ចំរើន ខ្លាចគ្រប់សព្វ ដល់ថ្នាក់រើបម្រះ ចំណងចងដៃឡើងរបូតតែម្ដង។ កាន់តែហួសចិត្តនោះគឺ គង់ ចំរើន បានតដៃជាមួយអ្នកគ្រប់គ្នាក្នុងកម្មវិធី ចាប់ពស់ ចាប់ក្រពើ គ្រវែងចេញតែម្ដង ហើយស្រែកច្រៀងស្ទើរមិនចេញ ស្លន់ស្លោស្រែករកម៉ែឱ្យជួយ។ ពេលចប់វិញ្ញាសាពិធីករសួថា រាងចាលហើយឬនៅប៉ុណ្ណឹង? គង់ ចំរើន ឆ្លើយទាំងញ័រមាត់ថា រាងហើយៗ។

 
ទាំងនេះជាអ្វីដែលកើតឡើងក្នុងកម្មវិធីកម្សាន្តបែបព្រឺព្រួច បើមិនភ័យ មិនញ័រ មិនស្លុត មិនមែន Killer Karaoke ទេ បើចូលមកដល់វេទិកានេះហើយដឹងតែបះសក់។ ជាពិសេស Killer Karaoke Cambodia រដូវកាលទី៧នេះ កាន់តែសាហាវជាមួយវិញ្ញាសាដ៏សំបូរបែប ធ្វើឱ្យទស្សនិកជនមើលហើយព្រឺសម្បុរខ្ញាកៗ។ Killer Karaoke Cambodia រដូវកាលទី ៧ មានផ្សាយទស្សនាលើកញ្ចក់ទូរទស្សន៍ហង្សមាស និងលើទំព័រហ្វេសប៊ុកផេក Killer Karaoke Cambodia រៀងរាល់ថ្ងៃ ព្រហ.  ចាប់ពីម៉ោង ៨ យប់តទៅ៕