កម្មវិធីកម្សាន្តលំដាប់ពិភពលោក Killer Karaoke Cambodia រដូវកាលទី៧ បានមកដល់សប្ដាហ៍ទី១០ហើយ។ មកដល់វគ្គនេះវិញ្ញាសាកាន់តែប្លែក កាន់តែគួរឱ្យព្រឺព្រួច ស្រៀវឆ្អឹងខ្នងជំនួសតារាកិត្តិយស។ កាលពីថ្ងៃ ព្រហស្បតិ៍ កន្លងទៅនេះកម្មវិធីបានបង្ហាញមុខតារាចម្រៀងរូបសង្ហា សំ សុវណ្ណារ៉ាក់ និងកញ្ញា ឈិន ម៉ានិច្ច ក្នុងវិញ្ញាសា មិនដែលប្រទះពីមុន ទស្សនាហើយអត់ទ្រាំមិនសើចមិនបានតែម្ដង។

មកលើកនេះកញ្ញា ឈិន ម៉ានិច្ច ត្រូវប៉ះនឹងវិញ្ញាសាថ្មីមួយពិតជាប្លែក គឺ «តុកៗ ជម្រាបសួរ»។ កុំច្រឡំថាវិញ្ញាសានេះឱ្យតារាកិត្តិយសទៅជិះតុកៗឱ្យសោះ គឺទៅគោះទ្វាអាថ៌កំបាំង តុកៗ ដោយមិនដឹងថាក្នុងផ្ទុះនោះមានអ្វីខ្លះទេ ធ្វើឱ្យម្ចាស់បទ «នារីក្នុងសុបិនបងជាអ្នកណា» ភ័យបុកពោះ។ ប៉ុន្តែជាសំណាងវិញ្ញាសានេះគ្រាន់តែបន្លាច ឈិន ម៉ានិច្ច ប៉ុណ្ណោះ មិនមានអ្វីគួរឱ្យរន្ធត់ប៉ុន្មានទេ គ្រាន់តែត្រូវគេជះម្សៅសមួយកាធុន និងទឹកមួយកាធុន ធ្វើឱ្យ ម៉ានិច្ច ស្រែកវ៉ាស់ៗភ្ញាក់ព្រើត។ តែចុងក្រោយ ម៉ានិច្ច នៅតែគេចមិនផុត ពីសត្វអាសិរពិសប្រចាំផ្ទះ Killer Karaoke Cambodia ពោល ចុងក្រោយ ត្រូវស្វាគមន៍ជាមួយកម្រងផ្កាសត្វពស់ពាក់ពេញ-ក។

អាចថា ឈិន ម៉ានិច្ច ធ្វើបុណ្យដល់មិនសូវជួបរឿងរន្ធត់ទេ ប៉ុន្តែ សំ សុវណ្ណារ៉ាក់ វិញប្រហែលជាយីអ៊ុនធ្លាក់ចុះបន្តិចហើយ ព្រោះមកត្រូវនឹងវិញ្ញាសាមួយគឺធ្ងន់ធ្ងរខ្លាំង។ ក្នុងវិញ្ញាសា «អសនៈប្ដូរកាយ» សំ សុវណ្ណារ៉ាក់ ត្រូវជួបហេតុការណ៍រន្ធត់ៗជាច្រើន។ ក្នុងវិញ្ញាសានេះ សុវណ្ណារ៉ាក់ ត្រូវស្វាគមន៍នឹងចរន្តអគ្គិសនីឆក់ទ្រីតៗ បន្ទាប់មកត្រូវបិតស្កុតស្អិតបករោមទ្រូង និងរោមជ្រើងឮសូរតែខ្វោកៗ។ នៅមិនទាន់អស់ទេ សុវណ្ណារ៉ាក់ ត្រូវច្រៀងទាំងរន្ធត់ព្រឺព្រួចជាមួយសត្វល្អិត សត្វអសិរពិសជាច្រើន ធ្វើឱ្យកំលោះសង្ហាម្នាក់នេះរន្ធត់មុខឡើងស្លេក សើចលែងសម។

ទាំងនេះហើយជាអ្វីដែលតែងកើតឡើងក្នុងកម្មវិធីកម្សាន្តដ៏ពេញនិយមខាងលើ អ្នកចូលរួមប្រកួតមិនបានដឹងជាមុនថាខ្លួននឹងត្រូវជួបរឿងអ្វីទេ។ បើក្លាហានហ៊ានមកហើយ ត្រូវតែប្រឈមនឹងហេតុការណ៍រន្ធត់តក់ស្លុត ព្រឺព្រួច។ Killer Karaoke Cambodia រដូវកាលទី៧ មានផ្សាយជូនទស្សនារៀងរាល់ថ្ងៃព្រហស្បតិ៍ តាមរយៈទូរទស្សន៍ហង្សមាស HDTV ចាប់ពីម៉ោង ៨ យប់តទៅ៕