បែកធ្លាយវីដេអូកាមេរ៉ាមុខរបស់ Oppo Reno ស៊េរីថ្មីលយចេញក្រៅបញ្ឆិតរាងដូចព្រុយត្រីឆ្លាម

វីដេអូលេចធ្លាយក្នុងបណ្តាញសង្គមរបស់ចិន Weibo កាលពីម្សិលមិញមួយត្រូវបានគេជឿថា ជា Oppo Reno ដែលវានឹងចេញលក់នាពេលខាងឆាប់ៗនេះ។ ជាក់ស្តែងក្រុមហ៊ុន Oppo ក៏បានប្រកាសថានឹងបង្ហាញម៉ូដែល Reno ស៊េរីថ្មីរបស់ខ្លួន នៅថ្ងៃទី ១០ ខែមេសា ខាងមុខនេះផងដែរ។ បើមើលតាមវីដេអូខាក្រោមនេះអាចឱ្យយើងដឹងថា ប្រភេទកាមេរ៉ាដែលលយចេញឡើងលើដូចជាព្រុយត្រីនេះ ប្រហែលជាកាមេរ៉ាមុខរបស់ Reno ស៊េរីថ្មី ហើយវាប្រហែលជាអាចទៅរួចព្រោះថា ទូរស័ព្ទបច្ចុប្បន្នក៏កំពុងផ្តោតទៅលើប្រភេទកាមេរ៉ាបង្កប់ និងលយចេញក្រៅពេលថតដូច្នេះដែរ។

តើនេះជាការរចនាកាមេរ៉ាថតរូបដែលល្អបំផុតដែរទេ? សព្វថ្ងៃក្រុមហ៊ុនផលិតប្រព័ន្ធប្រតិបត្តិការ Android កំពុងនឹងបង្កើនប្រសិទ្ធភាពផ្ទៃអេក្រង់ស្មាតហ្វូនរបស់ពួកគេ ជាមួយនឹងការប្រើប្រាស់រន្ធ punch-hole ឬកាមេរ៉ាបង្កប់លយឡើង សម្រាប់កាមេរ៉ាមុខ។ យ៉ាងណាក៏ដោយថ្វីបើពេលនេះយើងមិនទាន់បានដឹងថា កាមេរ៉ា Oppo Reno មានសមត្ថភាពថតរូបភាពបានកម្រិតណា ប៉ុន្តែអ្វីដែលគួរឱ្យចាប់អារម្មណ៍គឺរូបរាងដ៏ស្រស់ស្អាតរបស់វា ហើយវាក៏ជាបំណងរបស់ Oppo ដែលចង់ឱ្យទូរស័ព្ទរបស់ពួកគេកាន់តែមានគុណភាព និងការរចនាកាន់តែប្រណីត៕

អត្ថបទ៖ លីដា
ប្រភព៖ androidauthority