អង្គការសហប្រជាជាតិ៖ ព្យុះទីហ្វុង Yagi បានបង្កផលប៉ះពាល់ដល់កុមារប្រហែល ៦លាននាក់នៅក្នុងតំបន់អាស៊ីអាគ្នេយ៍

ព្យុះទីហ្វុង Yagi បានបង្កផលប៉ះពាល់ដល់កុមារប្រមាណជា ៦លាននាក់ទូទាំងតំបន់អាស៊ីអាគ្នេយ៍ នេះបើយោតាមរបាយការណ៍មួយរបស់អង្គការសហប្រជាជាតិ (UN) ដែលបានចេញផ្សាយនៅក្នុងថ្ងៃពុធ ទី១៨ ខែកញ្ញា។ គួររម្លឹកជូនថា នៅក្នុងរយៈពេល ២សប្តាហ៍ចុងក្រោយនេះ ព្យុះទីហ្វុង Yagi បានធ្វើដំណើរឆ្លងកាត់ប្រទេសចំនួន ៤នៅក្នុងតំបន់អាស៊ីគ្នេយ៍រួមមានប្រទេសវៀតណាម ថៃ ឡាវ និងប្រទេសមីយ៉ាន់ម៉ា។

នៅក្នុងរបាយការណ៍របស់ UN ដដែលនេះបានបញ្ជាក់ថា ផលប៉ះពាល់របស់ព្យុះទីហ្វុង Yagi ទៅកាន់ក្មេងៗទាំង​ ៦លាននាក់នោះរួមមាន ការខកខានមិនបានទៅសាលារៀន គ្មានទឹកស្អាតប្រើប្រាស់ គ្មានអាហារគ្រប់គ្រាន់ គ្មានកន្លែងស្នាក់នៅត្រឹមត្រូវ និងពុំ​ទទួលបានការថែទាំសុខភាពជាដើម។ សូមបញ្ជាក់ជូនថា គិតត្រឹមពេលនេះព្យុះទីហ្វុង Yagi នៅមិនទាន់រសាត់បាត់ពីប្រទេសថៃនិងមីយ៉ាន់ម៉ានៅឡើយទេ ហើយព្យុះមួយនេះបានបង្កឱ្យមានអ្នកស្លាប់បាត់បង់ជីវិតសរុបចំនួន ៥៣៧នាក់ហើយ បើគិតនៅក្នុងតំបន់អាស៊ីអាគ្នេយ៍ទាំងមូល៕

អត្ថបទ៖ ភក្តី

ប្រភព៖ The Strait Time