អាមេរិក៖ ក្រុមហ៊ុន Apple បានប្រកាសផ្តល់ប្រាក់រង្វាន់ចំនួន ១លានដុល្លារចំពោះអ្នកណា ដែលមានសមត្ថភាពអាចលួចចូល ឬ Hack ចូលក្នុងប្រព័ន្ធ Apple Intelligence (AI) ថ្មីរបស់ខ្លួនបាន នេះបើយោងតាមការចុះផ្សាយរបស់បណ្តាញសារព័ត៌មាន Daily Mail កាលពីយប់ថ្ងៃទី២៥ ខែតុលា។ ការប្រកាសផ្តល់ប្រាក់រង្វាន់នេះត្រូវបានធ្វើឡើងដើម្បីបញ្ជាក់ថា ប្រព័ន្ធ AI ថ្មីមួយ ដែលក្រុមហ៊ុន Apple ទើបដាក់ឱ្យប្រើប្រាស់ពិតជាមានសុវត្ថិភាព ១០០% ពោលគឺគ្មានអ្នកណាម្នាក់អាច Hack ចូលទៅប្រើប្រាស់បានគ្មានការអនុញ្ញាតនោះទេ។

សូមបញ្ជក់ជូនថា ប្រព័ន្ធ Apple Intelligence​ គឺជាប្រព័ន្ធថ្មីមួយ ដែលក្រុមហ៊ុនបច្ចេកវិទ្យាខ្នាតយក្សរបស់អាមេរិក Apple បានដាក់ឱ្យប្រើប្រាស់នៅក្នុងទូរស័ព្ទ iPhone 16 ដែលទើបចេញលក់កាលពីដើមខែកញ្ញាកន្លងមកនេះ។ យ៉ាងណាក្តី បើតាមលោក Tim Cook ដែលជានាយកប្រតិបត្តិរបស់ក្រុមហ៊ុន Apple បានឱ្យដឹងថា នៅសប្តាហ៍ក្រោយក្រុមហ៊ុនក៏នឹងបន្តដាក់ប្រព័ន្ធ Apple Intelligence​ នេះទៅក្នុងទូរស័ព្ទ iPhone 15 Pro និងទូរស័ព្ទ iPhone 15 Pro Max បន្ថែមទៀតផងដែរ ដែលមានន័យថា អតិថិជនដែលបានទិញទូរស័ព្ទ iPhone 15 Pro និងទូរស័ព្ទ iPhone 15 Pro Max ផលិតឡើងចាប់ពីសប្តាហ៍ក្រោយទៅគឺអាចប្រើប្រាស់ប្រព័ន្ធ Apple Intelligence​ បានដូចគ្នាទៅនឹងអ្នកប្រើប្រាស់ទូរស័ព្ទ iPhone 16 ផងដែរ៕

អត្ថបទ៖ ភក្តី

ប្រភព៖ Daily Mail