បង្ហោះម៉ូតូតាមផ្លូវសារធារណៈ ចុងក្រោយត្រូវសមត្ថកិច្ចឃាត់ខ្លួនធ្វើកិច្ចសន្យា ចំណែកម៉ូតូដកហូតរក្សាទុករយៈពេល៣ខែ
យោងតាមការចុះផ្សាយរបស់ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅថ្ងៃទី ១៤ ខែកុម្ភៈ ឆ្នាំ ២០២៥ នេះ បានឱ្យដឹងថា បន្ទាប់ពីមានការផ្សព្វផ្សាយព័ត៌មានតាមបណ្តាញសង្គម ជុំវិញករណីបង្ហោះម៉ូតូតាមផ្លូវសារធារណៈ នៅចំណុចផ្លូវបេតុង ភូមិត្រពាំងពោធិ៍ សង្កាត់ឪឡោក ខណ្ឌកំបូល។ នៅថ្ងៃទី ១៣ ខែកុម្ភៈ ឆ្នាំ ២០២៥ លោកវរសេនីយ៍ឯក ហុង ពិសិដ្ឋអធិការនគរបាលខណ្ឌកំបូល បានបញ្ជាឱ្យកម្លាំងជំនាញស្រាវជ្រាវ និងឃាត់ខ្លួនក្មេងទំនើងចំនួន ០៤នាក់ ពាក់ព័ន្ធករណីខាងលើ។
១-ឈ្មោះ ហោ លីហួ ភេទប្រុស មុខរបរសិស្ស ស្នាក់នៅភូមិគល់ សង្កាត់កន្ទោក ខណ្ឌកំបូល (អ្នកបើកបរ ម៉ូតូNEX)។
២-ឈ្មោះ សារុំ លីហេង ភេទប្រុស មុខរបរសិស្ស ស្នាក់នៅភូមិចំការដូច ឃុំឆក់ឈើនាង ស្រុកអង្គស្នួល ខេត្តកណ្ដាល (អ្នកបើកបរ ដាឌ្រីម)។
៣-ឈ្មោះ ដន សុវន្ថា ភេទប្រុស មុខរបរសិស្ស ស្នាក់នៅ ភូមិព្រៃរការ ឃុំឆក់ឈើនាង ស្រុកអង្គស្នួល ខេត្តកណ្ដាល (អ្នកជិះក្រោយ)។
៤ឈ្មោះ សោភ័ណ លីមីង ភេទប្រុស មុខរបរសិស្ស ស្នាក់នៅភូមិត្រពាំងក្រសាំង ឃុំបែកចាន ស្រុក អង្គស្នួល ខេត្តកណ្ដាល (អ្នកបើកបរ)។
ដោយវត្ថុតាងដកហូត៖ម៉ូតូចំនួន ០៣គ្រឿង (ម៉ាកហុងដាឌ្រីម ស៊េរីឆ្នាំ២០២៥ ពណ៌ខ្មៅ ពាក់ផ្លាកលេខ ភ្នំពេញ 1LC-8704, ម៉ាកNEX ស៊េរីឆ្នាំ ២០១៩ ពណ៌ស លាយផ្កាឈូក បិទតែមពណ៌ស ពាក់ផ្លាកលេខ បាត់ដំបង 1AF-3542, ម៉ូតូម៉ាកBEAT ស៊េរីឆ្នាំ២០២៤ ពណ៌ស លាយខៀវ ពាក់ផ្លាក ភ្នំពេញ 1-KX 628)។
បន្ទាប់ពីសួរនាំ សមត្ថកិច្ចជំនាញបានធ្វើការណែនាំអប់រំ និងធ្វើកិច្ចសន្យាបញ្ឈប់សកម្មភាពនេះ ដោយមានការធានាពីអាណាព្យាបាល យកទៅអប់រំបន្តនៅផ្ទះ ចំណែកម៉ូតូសមត្ថកិច្ចបានដកហូតរក្សាទុករយៈពេល០៣ខែ នៅប៉ុស្តិ៍នគរបាលរដ្ឋបាលឪឡោក៕
ប្រភព៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ