ស្រ្តីដែលធ្លាប់តាំងខ្លួនជាអ្នកមានបុណ្យជាព្រះនាងឥន្ទ្រទេវី ហើយបានប្រោះព្រំនាយទាហាននៅតំបន់ប្រាសាទតាមាន់ត្រូវបានហៅមកធ្វើកិច្ចសន្យា
យោងតាមការចុះផ្សាយរបស់ ក្រសួងធម្មការ និងសាសនា នាថ្ងៃទី៣០ ខែឧសភា ឆ្នាំ២០២៤ នេះ បានឱ្យដឹងថា លោកស្រី អេន ចរិយា ដែលធ្លាប់តាំងខ្លួនជាអ្នកមានបុណ្យជាព្រះនាងឥន្ទ្រទេវី ត្រូវបានកោះហៅមកធ្វើកិច្ចសន្យា ក្រោយបង្ហោះវីដេអូ រូបថតសកម្មភាពផ្សេងៗការប្រោះព្រំជូនកងទ័ពនៅប្រាសាទតាមាន់ និងការផ្សព្វផ្សាយនានាធ្វេីឲ្យប៉ះពាល់ប្រពៃណី ទំនៀមទម្លាប់ ព្រះពុទ្ធសាសនា សណ្តាប់ធ្នាប់សង្គម និងភាពថ្លៃថ្នូររបស់សង្គមជាតិ។
ចំណាត់ការខាងលើនេះ ត្រូវបានធ្វើឡើងដោយ លោក សៀក សារឿន ប្រធានមន្ទីរធម្មការនិងសាសនាខេត្តកណ្តាល សហការជាមួយអាជ្ញាធរមូលដ្ឋានក្រុងតាខ្មៅ ដោយធ្វេីការណែនាំ លោកស្រី អេន ចរិយា ជុំវិញការបង្ហោះវីដេអូ សកម្មភាព និងរូបភាពធ្វេីឲ្យប៉ះពាល់ដល់សន្តិសុខសង្គម តាមបណ្តាញសង្គមនានា និងធ្វេីកិច្ចសន្យាបញ្ឈប់ការបង្ហោះ លុបវីដេអូ រូបថតសកម្មភាពផ្សេងៗ មានការប្រោះព្រំជូនកងទ័ពនៅប្រាសាទតាមាន់ និងការផ្សព្វផ្សាយនានាធ្វេីឲ្យប៉ះពាល់ប្រពៃណី ទំនៀមទម្លាប់ ព្រះពុទ្ធសាសនា សណ្តាប់ធ្នាប់សង្គម និងភាពថ្លៃថ្នូររបស់សង្គមជាតិ ចេញពីប្រព័ន្ធបណ្តាញសង្គមទាំងអស់៕
ប្រភព៖ ក្រសួងធម្មការ និងសាសនា