មួយរយះកន្លងទៅនេះព័ត៌មានលេចធ្លាយជាច្រើនចេញពីរូបរាង ក៏ដូចជាកម្លាំងម៉ាស៊ីនដែលមានបំពាក់លើស្មាតហ្វូន Flagship របស់ Samsung នោះគឺ Galaxy Note 10 Series។ ប្រភពពីបរទេសបានបង្ហាញពីពិន្ទុនៅលើ Benchmark របស់ Galaxy Note 10 5G បានបង្ហាញពិន្ទុ២ ផ្សេងគ្នាដែលមួយមានលេខកូដម៉ូឌែល SM-N976V និង SM-N976B។

ដូចដែលអ្នកទាំងអស់គ្នាដឹងហើយថាគ្រប់ម៉ូឌែលរបស់ Samsung ត្រកូល Flagship តែងតែប្រើបន្ទះឈីបផ្សេងគ្នាដោយទូទាំងពិភពលោកគឺ ប្រើប្រាស់បន្ទះឈីប Exynos ដែលផលិតដោយ Samsung ផ្ទាល់លើកលែងតែ សហរដ្ឋអាមេរិក កាណាដា ប្រទេសចិន ប្រទេសជប៉ុន និងអាមេរិកឡាទីន តែប៉ុណ្ណោះដែលប្រើប្រាស់បន្ទះឈីប Snapdragon របស់ក្រុមហ៊ុន Qualcomm របស់អាមេរិក។

សម្រាប់លេខកូដម៉ាស៊ីន SM-N976V នៅលើ Benchmark ដែលត្រៀមនឹងលក់នៅលើ Verizon បានបញ្ជាក់យ៉ាងច្បាស់ថាម៉ូឌែលនេះនឹងមានបំពាក់ Ram ទំហំ 12GB និងបំពាក់មកជាមួយនឹងបន្ទះឈីបប្រភេទ Snapdragon 855 ដូចទៅនឹង S10 5G ដែរ។

ហើយលេខកូដម៉ាស៊ីន SM-N976B ដែលនឹងត្រៀមដាក់លក់ជុំវិញពិភពលោកវិញ ដែលបានបង្ហាញនៅលើ Benchmark នោះគឺមានបំពាក់ Ram ទំហំ 8GB និងបំពាក់មកជាមួយនឹងបន្ទះឈីប Exynos 9825៕

ប្រភព៖ Phone Arena
អត្ថបទ៖ សំរិទ្ធ