ថ្មីៗនេះអ្នកវិទ្យាសាស្ត្រមកពីសាកលវិទ្យាល័យ California San Diego បានបង្កើតនូវលែនភ្នែកគំរូមួយ ដែលអាចគ្រប់គ្រងដោយចលនារបស់ភ្នែកយើងផ្ទាល់តែម្ដង។ លែននេះមានសម្ថភាពអាចពង្រីក ឬបង្រួម ដោយគ្រាន់តែព្រិចភ្នែកពីរដងតែប៉ុណ្ណោះ។ របាយការណ៍រៀបរាប់លម្អិតពីការរកឃើញរបស់ក្រុមនេះ ក៏ត្រូវបានបោះពុម្ពផ្សាយក្នុងខែនេះផ្ទាល់ នៅក្នុងទិនានុប្បវត្តិ Advanced Functional Materials ផងដែរ។ លែនជីវម៉ាសនេះ ត្រូវបានផលិតចេញពីប៉ូលីមែរដែលអាចពត់បាន (stretchy polymer film) និងអាចឆ្លើយតបនឹងសញ្ញាអេឡិចត្រិក ដែលបំលែងចេញពីការព្រិចភ្នែករបស់អ្នក។

វាត្រូវបានគេស្គាល់ថា Electro-oculographic ឬ EOG ហើយមនុស្សថែមទាំងអាចបញ្ចេញថាមពលអេឡិចត្រិក នៅពេលពួកគេកំពុងគេងទៀតផង។ ដោយអ្នកដឹកនាំការស្រាវជ្រាវលោក Shengqiang Cai បានមានប្រសាសន៍ប្រាប់ New Scientist ថា៖ «ទោះបីជាភ្នែករបស់អ្នកបិទជិតក៏ដោយ ក៏គ្រាប់ភ្នែករបស់មនុស្សយើងនៅតែអាចធ្វើចលនា និងបង្កើតសញ្ញា Electro-oculographic នេះបានដែរ»។ ប៉ុន្តែយ៉ាងណាក៏ដោយវានៅតែជាគំរូនៅឡើយទេ ដោយសារពួកគេត្រូវការពេលវេលាសិក្សាបន្ថែមលើការស្រាវជ្រាវនេះ ហើយពួកគេជឿជាក់ថា វានឹងមានសក្ដានុពលសម្រាប់អនាគត៕

អត្ថបទ៖ លីដា