យោងតាមទិន្នន័យពី Where is Roadster បានឱ្យដឹងថា អ្នកបើកបរអវកាស (Starman) របស់ SpaceX បានបញ្ចប់ការជិះរថយន្ត Tesla Roadster នៅក្នុងគន្លងវិថី ដោយធ្វើដំណើរជុំវិញអាទិត្យរយៈពេល ៥៥៧ថ្ងៃ ចាប់តាំងពីមានការបង្ហោះរ៉ុកកែត Falcon Heavy ក្នុងគោលបំណងជិះឱ្យបានជុំវិញព្រះអាទិត្យនេះ។ Roadster នេះបានធ្វើដំណើរប្រមាណ ៧៦២លានម៉ាយ ចាប់តាំងពីពេលនោះមក ដែលដើមឡើយរថយន្តនេះត្រូវបានគេរំពឹងថា នឹងជិះបានតែ ៣៦,០០០ម៉ាយ ឬ ២១,០០០ដង ប៉ុណ្ណោះ។ (គួរឱ្យស្ដាយ Starman នៅមិនទាន់អាច Drift លើអវកាសបាននៅឡើយទេ)

បច្ចុប្បន្នផែនដីគឺស្ថិតនៅផ្នែកម្ខាងនៃព្រះអាទិត្យ ហើយរថយន្តអគ្គីសនីរបស់ក្រុមហ៊ុន Tesla មួយនេះនឹងមិនអាចមកជិតផែនដីម្តងទៀតទេ រហូតដល់ថ្ងៃទី៥ ខែវិច្ឆិកា ឆ្នាំ២០២០ នៅពេលដែលវាមានចម្ងាយប្រហែល ០.៣៤៦ AU (ឯកតាតារាសាស្ត្រ) ឬចម្ងាយក្រោម ៣២.២លានម៉ាយ ពីផែនដី ។ វានឹងកាន់តែខិតទៅជិតភពព្រះអង្គារនៅចម្ងាយ ០.០៥ AU (ប្រហែល ៤.៦លានម៉ាយ) នៅថ្ងៃទី០៧ ខែតុលា ឆ្នាំ២០២០។ បន្ទាប់មក Starman នឹងត្រូវឯកោរយៈពេលយូរ ព្រោះគាត់ប្រហែលជានឹងមិននៅជិតផ្ទះ (ផែនដី) រហូតដល់ ឆ្នាំ២០៤៧ ឯណោះ។ ចំពេលអាមេរិកកំពុងមានបំណងបញ្ចូនមនុស្សទៅភពព្រះអង្គារឱ្យបានត្រឹម ឆ្នាំ២០៣០ អាចនិយាយបានថា នៅពេលដែលគាត់ (Starman) ត្រឡប់មកផែនដីវិញ ការធ្វើដំណើរអវកាសនឹងអាចក្លាយជារឿងធម្មតា៕

អត្ថបទ៖ លីដា