យោងតាមប្រភពព័ត៌មាន The Phonearena បានឲ្យដឹងកាលពីថ្ងៃអង្គារម្សិលមិញនេះថា ក្រុមហ៊ុន Google បានដាក់ឲ្យដំណើរការ Android 10 របស់ខ្លួនហើយដែលវាគឺជាគំរូប្រព័ន្ធប្រតិបត្តិការបច្ចេកវិទ្យាចុងក្រោយ ដែលត្រូវបានកន្លងមកស្គាល់ថា Android Q។

Android 10 នេះផងដែរក៏ជាប្រព័ន្ធប្រតិបត្តិការ OS ទីមួយហើយរបស់ Google ដែលមិនបានបញ្ចូលឈ្មោះជាមួយនឹងឈ្មោះបង្អែមនានាគិតចាប់តាំងតែពីឆ្នាំ២០០៨ ដែលវាត្រូវបានគេមើលឃើញថា ជាយុទ្ធសាស្ត្រថ្មីមួយរបស់ក្រុមហ៊ុនផងដែរ។

មុខងារមួយចំនួនរបស់ Android 10 ត្រូវបានគេមើលឃើញមានតាំងតែពីខែមេសា ប៉ុន្តែទើបតែមកដល់ពេលនេះទើបក្រុមហ៊ុនបានធ្វើការបញ្ជាក់ជាផ្លូវការអំពីឧបករណ៍ និងព័ត៌មានពិស្តារនៃការអាប់ដេត។ មិនមានអ្វីភ្ញាក់ផ្អើលឡើយគឺថាទូរស័ព្ទស៊េរី Pixel របស់ Google ផ្ទាល់នោះគឺជាអ្នកដែលបានដំណើរការប្រព័ន្ធនេះមុនគេ ប៉ុន្តែក្នុងចំណោមនោះដូចជា Pixel 3, Pixel 3a នឹងអាចធ្វើការអាប់ដេត Android 10 បានគិតចាប់ពីថ្ងៃទី៣ខែកញ្ញានេះហើយ។

ក្នុងនោះផងដែរ Google ក៏បានបញ្ជាក់ទៀតថា ឧបករណ៍របស់ក្រុមហ៊ុនជាដៃគូជាច្រើនទៀតនឹងអាចអាប់ដេតដំណើរការ Android 10 យ៉ាងយូរបំផុតត្រឹមចុងឆ្នាំនេះប៉ុន្តែដោយមិនបានបញ្ជាក់ច្បាស់លាស់ពីប្រភេទឧបករណ៍ និងក្រុមហ៊ុនផលិតរបស់វាណាមួយឡើយ៕

អត្ថបទ៖ Lee