បច្ចេកវិទ្យាសាកថ្មល្បឿនលឿន Super VOOC របស់ក្រុមហ៊ុន OPPO ពិតជាអស្ចារ្យមែនទែន ដែលមានសមត្ថភាពបញ្ចូលថ្មបានយ៉ាងលឿន និងមិនសូវឡើងកំដៅផងដែរ។ កាលពីពេលថ្មីៗនេះ លោក Brian Shen អនុប្រធានក្រុមហ៊ុនប្រតិបត្តិរបស់ក្រុមហ៊ុនផលិតទូរស័ព្ទយក្សចិន OPPO បានបង្ហោះនៅលើបណ្តាញសង្គម Weibo ដោយបង្ហាញពីបច្ចេកវិទ្យាថ្មី upgrade បន្ថែមពីលើ Super VOOC ជំនាន់មុន ដែលអាចបញ្ចូលថ្មទំហំ 4,000mAh មួយពេញ ចំណាយពេលតែប៉ុន្មាននាទីប៉ុណ្ណោះ ប៉ុន្តែខាងក្រុមហ៊ុនមិនទាន់បញ្ជាក់ពីពេលវេលាពិតប្រាកដនៃការបញ្ចូលថ្មឡើយ ដោយរងចាំថ្ងៃប្រកាសជាផ្លូវការ។

កាលពីជំនាន់ OPPO Find X Lamborghini ក្រុមហ៊ុនបានបញ្ចេញបច្ចេកវិទ្យាសាកថ្មលឿន 50W ដែលអាចសាកថាមពលថ្ម 3,400mAh ពី 0% ដល់ 93% ចំណាយពេលតែ ៣០នាទីប៉ុណ្ណោះ ហើយចំពោះបច្ចេកវិទ្យា Super VOOC ថ្មីនេះ ត្រូវបានគេសង្ស័យថា សមត្ថភាពបញ្ចូលថ្មរបស់វាអាចឡើងដល់ 80W ឯណោះ ប៉ុន្តែទោះជាយ៉ាងណានេះគ្រាន់តែជាការសន្និដ្ឋានប៉ុណ្ណោះ។

តាមការសង្កេតរបស់អ្នកជំនាញបានជឿជាក់ទៀតថា ក្រុមហ៊ុន OPPO កំពុងធ្វើការងារអភិវឌ្ឍ និងផលិតទូរស័ព្ទ Reno ម៉ូដែលថ្មី ដែលជឿជាក់ថា ជាជំនាន់ក្រោយមួយទៀតរបស់ Reno 10x Zoom ដោយជំនាន់ថ្មីនេះនឹងមានល្បឿនអេក្រង់ដល់ទៅ 90Hz និងបំពាក់មកជាមួយនឹងថ្មសាក Super VOOC ថ្មីនេះផងដែរ៕

អត្ថបទ៖ Lee