ព័ត៌មានចេញផ្សាយកាលពីដើមខែកន្លងមកបានឲ្យដឹងថា ក្រុមហ៊ុន Qualcomm នឹងធ្វើការណែនាំបង្ហាញខ្លួនបន្ទះឈីបថ្មីរបស់ខ្លួនគឺ Snapdragon 865 យ៉ាងយូរបំផុតនៅក្នុងខែវិច្ឆិកាខាងមុខនេះ ហើយនៅមិនទាន់មានព័ត៌មានច្រើនពាក់ព័ន្ធនឹងធាតុសំខាន់ៗរបស់បន្ទះឈីបនេះឡើយ ប៉ុន្តែជឿជាក់ថាវាត្រូវបានផលិតដោយក្រុមហ៊ុន Samsung។

លើសពីនេះអ្វីដែលយើងអាចបានដឹងនោះគឺថា Snapdragon 865 នេះនឹងផលិតចេញមក២ប្រភេទ ក្នុងនោះមួយនឹងបំពាក់បច្ចេកវិទ្យា modem សម្រាប់កម្មវិធីអ៊ិនធឺណេតឥតខ្សែ 5G ផងដែរ។ ហើយថ្មីៗនេះតាមរយៈ WCCTech បានអះអាងថា មានក្រុមហ៊ុនផលិតទូរស័ព្ទចិនដ៏ប្រណិតមួយ បានសម្រេចចិត្តក្នុងការប្រើប្រាស់បន្ទះឈីបដ៏ថ្មីសន្លាងនេះ ជាមួយនឹងស្មាតហ្វូនម៉ូដេលថ្មីរបស់ខ្លួន។

ស្មាតហ្វូនថ្មីនោះត្រូវបានគេស្គាល់ថា Titanium M6 5G ជាផលិតផលរបស់ក្រុមហ៊ុនឈ្មោះថា 8848 ហើយជឿជាក់នឹងមានតម្លៃមិនធូរថ្លៃឡើយ។Titanium M6 5G មានអេក្រង់ប្រភេទ AMOLED ទំហំ 6.01អ៊ិញ, សេនស័រកាំមេរ៉ា 64MP ដែលមានសមត្ថភាពផលិតរូបភាព 100MG ខណៈដែលមាន RAM ទំហំ 12G និងអង្គចងចាំដល់ទៅ 1TB ផងដែរ៕

អត្ថបទ៖ Lee