កាលពីពេលថ្មីៗនេះ ក្រុមហ៊ុន Huawei បានធ្វើការប្រកាសជាផ្លូវការនូវថេបប្លេតថ្មីមួយ ហើយក៏ជាថេបប្លេតដំបូងគេបំផុត ដែលប្រើកាមេរ៉ាទំលុះអេក្រង់ផងដែរ ដែលថេបប្លេតថ្មីរបស់ Huawei នេះមានឈ្មោះថា MatePad Pro។ ព័ត៌មានចុងក្រោយបានអះអាងថា វត្តមានរបស់ MatePad Pro គឺត្រូវបានផលិតឡើង ដើម្បីធ្វើយ៉ាងណាប្រកួតប្រជែងទីផ្សារជាមួយនឹង iPad Pro និង Samsung Galaxy Tab S6 ផងដែរ។

MatePad Pro មានអេក្រង់ទំហំ 10.8-inch AMOLED ជាមួយកំរិតបង្ហាញរូបភាព 2560 x 1600 pixel ដែលមានគែមជុំវិញអេក្រង់ត្រឹមតែ 4.9mm តែប៉ុណ្ណោះ ធ្វើឲ្យអេក្រង់ផ្ទៃខាងលាតសន្ធឹងដល់ 90% ឯណោះ។ ថេបប្លេតនេះមានកាមេរ៉ាមុខសម្រាប់ស៊ែលហ្វីទំហំ 8MP និងមានកាមេរ៉ាក្រោយទំហំ 13MP ហើយកាន់តែពិសេសនោះគឺមាន speaker ដល់ទៅ 4គ្រាប់ឯណោះ។

MatePad Pro រត់ដោយបន្ទះឈីប Kirin 990 Soc មាន RAM 6-8GB និងមានអង្គផ្ទុកទិន្នន័យ 128-256GB ដោយវាមាន២ជម្រើស គឺប្រភេទប្រើតែ Wifi និងប្រភេទអាចដាក់ស៊ីមប្រើបាន ហើយវារត់ដោយប្រព័ន្ធប្រតិបត្តិការ Android 10 ជាមួយស្បែក EMUI 10 ប៉ុន្តែគួរឲ្យសោកស្តាយគឺវាមិនអាចប្រើ Google Service បានឡើយ។ ថេបប្លេតនេះមានកម្លាំងថ្មដល់ទៅ 7,250mAh និងមានបច្ចេកវិទ្យាសាកស្មល្បឿនលឿនប្រើខ្សែដល់ 40W និងសាកថ្មល្បឿនលឿនឥតខ្សែដល់ 15W ព្រមទាំងអាចសាកថ្មទៅឧបករណ៍ដទៃបានក្នុងល្បឿន 7.5W ថែមទៀតផង៕

អត្ថបទ៖ Lee