តើវីរុសកូវីដ១៩ស្ថិតនៅលើបរិយាកាស និងវត្ថុផ្សេងៗបានយូរប៉ុនណា?
វីរុស COVID-19 ជាមេរោគដែលអាចឆ្លងយ៉ាងឆាប់រហ័សបំផុត ដោយឆ្លងតាមតំណក់ទឹកមាត់ និងវត្ថុរាវរបស់អ្នកជំងឺ។ តើធ្លាប់ដឹងទេថា វីរុស COVID-19នេះ អាចស្ថិតនៅលើអាកាស ឬវត្ថុផ្សេងៗបានរយៈពេលប៉ុន្មានម៉ោង? ប៉ុន្មានថ្ងៃ?
បើតាមការសិក្សាស្រាវជ្រាវរបស់វិទ្យាស្ថានជាតិសុខាភិបាលអាមេរិក វីរុស COVID-19 ឆ្លងបានតាមរយៈទឹកមាត់ ឬវត្ថុរាវរបស់អ្នកជំងឺដែលវិជ្ជមានវីរុស COVID-19។ នៅពេលដែលអ្នកជំងឺក្អក ឬកណ្តាស់ ហើយមានខ្ទាតដំណក់ទឹកមាត់ចេញមកខាងក្រៅ វាអាចបណ្តាលឲ្យឆ្លងទៅអ្នកដទៃទៀតព្រោះវីរុស COVID-19 នេះអាចរស់នៅលើលំហខ្យល់បានយ៉ាងតិចរយៈពេល ៣ម៉ោង ហើយវាអាចរស់នៅបានយ៉ាងតិច ២-៣ថ្ងៃ ចំពោះវត្ថុដែលធ្វើពីជ័រ ឬដែកដែលមិនងាយច្រែះ។ លើសពីនេះ វីរុស COVID-19 អាចរស់នៅបានរយៈយ៉ាងតិច៤ម៉ោងនៅលើវត្ថុដែលផលិតពីស្ពាន់ ហើយវាក៏មានសមត្ថភាពរស់នៅលើក្រដាសកាតុងបានផងដែរក្នុងរយៈពេលមិនលើសពី២៤ម៉ោងទេ។
នាយកដ្ឋានប្រយុទ្ធនឹងជំងឺឆ្លងកម្ពុជា(CDC) បានបញ្ចាក់ឲ្យដឹងថា ចំងាយខ្ទាតទឹកចេញពីមុខរបស់មនុស្សយើងចំងាយបាន ៣ហ្វីត ស្មើនឹង៩០សង់ទីម៉ែត្រ ហើយដំណក់ទឹកតូចៗដែលខ្ទាតចេញពីអ្នកជំងឺទៅដល់ទីណា មេរោគនឹងទៅដល់ទីនោះដូចគ្នា។ ដូចនេះ សូមនៅឆ្ងាយពីអ្នកជំងឺលើសពី១ម៉ែត្រ យើងនឹងគេចផុតពីដំណក់ទឹកតូចៗទាំងនោះ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ